Ang pagpanalipod sa kalikopan dili pinili

Sa ilang tulo ka pahina nga apelar ngadto sa lalawigan sa Sugbo, ang Philippine Earth Justice Center, Inc., Freedom from Debt Coalition-Cebu ug Central Visayas Farmers Development Center miawhag sa pagpahunong sa oil exploration nga gihimo sa lungsod sa Aloguinsan. Kini human makaplagi sa langyaw nga kompanya ang pundo sa lana sa lungsod sa Aloguinsan ug siyudad sa Carcar.

Ang tulo ka mga kahugpongan miingon nga ang lungsod sa Aloguinsan kabahin sa Tanon Strait Protected Seascape busa ila kining gisupak ug gipahunong tungod sa legal, social, health, climate ug ecological grounds. Pero kun ikaw ang pangutan-on, sakto ba sila?

Ang pagpangita og lana sa lungsod sa Aloguinsan ug siyudad sa Carcar gihatagan og pagtugot sa Departamento sa Enerhiya ug sa Departamento sa Kalikopan. Kining duha nga mihatag og pagtugot mga ahensiya sa gobiyerno nga gilangkoban sa mga eksperto sa ilang tagsa-tagsa ka mga fields. Gawas niini, mga ahensiya usab silang gitahasan sa pagpanalipod sa atong kalikopan.

Ang tulo ka grupo nga misupak sa pagpangita og lana aduna upod rason ug dili upod puwede nga ipadaplin sa gobyerno ang ilang mga kabalaka sa mahimong kadaut sa kalikopan sa gipadayong exploration sa lana sa Aloguinsan ug Carcar. Apan sa bag-ong teknolohiya matubag seguro ang ilang mga kabalaka.

Gawas niini, ang pagpanalipod sa kalikopan dili lamang kini iya sa Pilipinas kun dili iya kini sa tanang namuyo sa kalibotan ug sa tanang kanasuran. Busa kun tinud-anay ang pagpakabana sa tulo ka grupo sa kalikopan mas maayong unahon niya sa pagprotesta ug ipanawagan nga ihunong ang paghimo og lana sa mga dagkong producers og lana sa tibook kalibotan.

Kinahanglan nga dili magpili ang Philippine Earth Justice Center, Inc., Freedom from Debt Coalition-Cebu ug Central Visayas Farmers Development Center sa ilang pagpakabana sa kalikopan. Kun tan-aw sa nahisgotang grupo nga makadaot sa kalikopan ang oil exploration, kinahanglang unahon nila sa pagprotesta ang mga sakop sa Organization of Petroleum Exporting Countries (OPEC) kay dugay na silang nakahimo og kadaut sa kalikopan kay sa naghimo niini sa Pilipinas.