100-M population: Burden o blessing?

Giingon nga moabot kita’g 100 million nga population sa mosunod nga katuigan. Samtang daghan ang miingon nga makadaut kini sa atong nasud, ang uban usab moingon nga makaayo. Sa ato pa, agad, how we look at it.

Moingon sila nga ang over population maoy nakaingon sa atong ka-pobre ug kaalaut. Di sila motuo nga ang corruption, smuggling, overpricing, commission, tax evasion ug failure in governance, maoy major nga hinungdan sa pagka-ut-ot sa atong nasud.

Sa laing bahin, aduna say moingon nga kun properly harnessed, ang kadaghan sa atong population, makaayo kanato, giisip nga “key to economic progress” in Party-list Representative Lito Atienza.

Si Atienza mipalig-on sa iyang baruganan sa pagka-sagrado sa kinabuhi sa tawo ug sa banay. Niya pa: “Our greatest treasure is our family and our children. Let us not be misled into believing that our country’s population is to be blamed for everything that goes wrong. If cared for, guided and made productive, our people will always be our greatest asset.”

Tinuod, kining atong kadaghan, kun atimanon pag-ayo, hatagan sa hustong edukasyon, ug himuong productive, silbihan og maayo sa gobiyerno ug hatagan “more in laws” ang mga kabus, magmalampuson kining atong nasud.

Abundant ug tabunok ang atong natural resources...“which are enough to provide for everyone’s needs, matud ni Atienza. Bitaw, ang nakadaut lang kay gumikan sa subrang kahakog sa tawo, ang atong nasudnong bahandi gipanag-iya lang sa pipila ka tawo. The rest gihikawan niining gasa gikan sa Langit. Subra ang pamintaha.

Padayon ni Atienza: “The problem lies in the distribution of wealth and utilization of the abundant natural resources, as they are either abused or misused for selfish interests.” Tinuod, dili over population ang problema, kun dili ang kahakog sa tawo ug ka-incompetent sa mga alagad sa lungsod, maoy nakaingon niining atong kawad-on.

Kahinumdom ko nga sa diha pa ta sa gobiyerno, gisuwayan namo’g patuman ang pag-fill up sa usa ka gamay’ng papel nga maglista unsay nahimo sa matag empleyado nianang adlawa...“What have I done today?”

Wa’a kaayo to madugay pagpatuman tungod kay maglisud sila’g fill-up, labi na kun wala sila’y nahimo tibuok adlaw, o gamay ra ang nahimo.

Kun mao kini ang atong ipabuhat sa matag opisyal ug empleyado sa gobiyerno...ato silang palistahon unsay ilang nahimo the whole day, to compensate sa ilang suweldo, mapugos tingali sila’g lihok aron duna sila’y ikasuwat isip accomplishments for the day.

Duaw bisa’g asa o diin nga opisina sa gobiyerno, imong makita nga pila ra ang maglihok, majority nagtanga. Dugay mobalik gikan sa pag-snacks ug alas 4 pa, nang-lipsticks ug nanudlay na. Unya ang ilang pasanginlan sa atong kawad-on mao ang over population, dili ang ilang kapakyas paghatag sa hustong matang sa pag-alagad ngadto sa nagsuweldo kanila. Failure in governance ug incompetence, pakapinan sa corruption here and there, mao kini ang tinuod nga culprit. Di ba?