Lana sa Sugbo

Dakong balita kining report mahitungod sa dakong oil discovery sa lungsod sa Aloguinsan ning lalawigan sa Sugbo. Kay kun tinuod gayud kini, dako unya kini og ikatabang sa ekonomiya sa probinsiya.

Sa niaging semana mianunsiyo ang Gas2Grid, usa ka Australian company, mahitungod sa discovery sa usa sa mga oil field niini. Ug positibo, matud pa sa maong kompanya, nga adunay dakong deposito kini sa lana.

Matud pa sa maong kompanya nga mokabat ngadto sa 40 milyones ka barel ang anaa sa oil field sa Aloguinsan. Kun tinuod kini, dako kini og ikatabang sa oil consumption sa nasud nga hangtud karon tua pa nagsalig sa gawas.

Sa pagkakaron, mayoridad sa oil consumption sa nasud atua naggikan sa laing kanasuran, ilabina sa Middle East. Dako kini nga gasto sa atong gobiyerno. Ilabina nga ang lana maoy nag-unang commodity sa nasud.

Ug kun makabuwelo kining giingong lana nga nadiskobrehan dinhi sa Sugbo, mohubas bisan gamay ang pagsalig sa Pilipinas sa lana sa gawas. Ug dakong pondo ang ma-save sa kaban sa kagamhanan.

Dili ikalimod nga bilyones ang gasto sa kagamhanan pag-import og lana gikan sa gawas aron pagpadagan sa mga makinarya sa nasud. Gani ang lana maoy nag-unang import sa Pilipinas matag tuig.

Ug niining dakong oil discovery dinhi sa Sugbo, siguradong matibhangan gayud ang pagsalig sa nasud sa mga lana gikan sa gawas. Ug nagpasabot kini nga dugang pondo ang magasto sa kagamhanan alang sa laing mga proyekto.

Apan ang labing mabulahan niining maong maayong kalamboan mao mismo ang mga Sugboanon. Kini gumikan kay moani kini og mga trabaho, ilabina didto sa Aloguinsan ug kasilinganang lugar.

Labaw sa tanan, maghatag kini og dugang pabilo alang sa dugang kalamboan sa lalawigan sa Sugbo. Mobaskog pa unya ang economic activity sa probinsiya gumikan niini. Ug hinaut nga mas daghan pang lana ang makawtan dinhi sa atong probinsiya.