EDITORYAL - 2014 tuig sa polis ug kriminal

Samtang  naningkamot  ang  mga  kriminal  nga  molambo  ang  ilang  panginabuhi ning tuig sa  kahoy  nga  kabayo, naningkamot  usab  ang  kapolisan  sa pagpuo  kanila.

Ang  tuig  sa kabayo  giingon  nga  abunda  ang  kuwarta  sa  mga  tawo  busa  naglaum  ang  mga  kawatan, tulisan, snatcher, mangunguot  ug  mangingilad  nga  makuwartahan  sila  ning  tuiga.

Gitun-an  nila ang  tanang  paagi  unsaon pagpangawat, panguot, panglabni  ug  tanang  matang  sa krimin  aron  sila  makakuwarta.

Samtang  si  Director General Alan Purisima  sa Philippine  National  Police (PNP) mibahad  nga  paninguhaon   sa  kapolisan  nga  mapaslak  ang  labing  daghang  kriminal, kun  di  man  ugaling  mahurot,  sa prisohan  ning  tuiga.

Iyang gimandaran  ang  tanang  kumander  sa PNP  sa matag  rehiyon  nga  magtinarong  sa pagbantay  sa katawhan  batok  sa mga kriminal  ug  tarungon  usab  ang  pag-report niini.

Wa  hinuon  imando  niya  nga ipapatay , apan  kutob  sa mahimo  madakpan  ang  daghang  kriminal  ug  mabalhug  sa prisohan  ning tuiga.

Miingon  si  Purisima  nga  puol  na  kaayong  paminawon  nga  may maghilak  kay  gikuotan, gilabnihan,  giilad,  gikawatan  ug  gitulisan.

Sa laing  bahin ang  kawatan  makalighot  gyud  og  pangawat  sa  mga  dapit  nga  way  polis nga  makakita. Kini  ilabi  na  kun  magdanghag  ang  tawo  o  kaha wa  kanunay  sa iyang  hunahuna ,  hinungdan  nga  mabiktima.