Nituo ko sa kasinsiro ug kamatinud-anon ni Gobernador Hilario “Junjun†Davide, III sa iyang trabaho. Ug nagpasalamat ko nga sinsitibo siya sa mga pagsaway alang sa ikaayo sa iyang administrasyon.
Gani human nako gihisgutan ang gipasagdan lang nga mga tent nga hinatag sa China, karon wala na ko makakita niini didto sa parking area. Hinaut nga naapud-apod na ni ngadto sa mga angayang hatagan niini. Usa sa mga programa ni Davide nga angayang paluyohan mao ang paglutos sa mga nalambigit sa illegal nga pangisda. Ug nalipay ko nga sunod-sunod ang kampanya nga gihimo sa mga sakop sa Provincial Anti-Illegal Fishing Task Force pinangulohan sa chief security officer sa Kapitolyo nga si Luy Madrigal.
Apan hinaut nga, sama sa gobernador, sinsiro sab ang tanang sakop sa task force sa pagtuman sa ilang trabaho ug way sagol binuang aron hatagan og pabor ang ubang mga negosyante. Niabot nako ang reklamo sa mga biyahero nga gidakop sa grupo ni Madrigal.
Ang ilang reklamo, dunay gipili ang task force sa mga sakyanan nga magtumod og isda paingon sa Pasil Market. Dili tanang magtumod og isda ang ilang parahon atol sa checkpoint. Lain nilang reklamo, way kaubang fish examiner gikan sa Bureau of Fisheries and Aquatic Resources kon BFAR ang task force atol sa checkpoint ug gimata-mata lang ang pag-ila binuthan ba o dili ang isda.
Gireklamo sab sa mga biyahidor ang giingo’ng kapakyas pag-isyu og resibo sa task force sa mga kargamento nga ilang gisakmit. Ug ang labing bug-at sa tanang pasangil mao nga ang mga sakop sa task force migamit sa mga pump boat sa usa ka tag-iya og panagatan matag higayon nga magpatrolya sila sa kadagatan didto sa amihanang Sugbo. Kini maoy hinungdan nga ang tag-iya sa maong panagatan protektado ug ang iyang mga kumpitensiya maoy kanunay’ng gidakop.
Si Madrigal sa report sa The Freeman mihimakak sa pasangil ug nagkanayon nga normal lang sa mga madakpan ang mamasangil. Husto, dunay punto si Madrigal. Apan mas maayong iyang tubagon punto-por-punto ang mga pasangil.
Una: Tinuod ba’ng dunay pinalabi ang task force sa ilang kampanya? Ikaduha: Tinuod ba nga wa sila’y kauban nga examiner sa BFAR sa matag operasyon ug nga pulos mata-mata lang ang himuon nilang pakisusi kuha ba pinaagi sa dinamita o dili ang isda? Ikatulo: Kinsa mang sakyanan ilang gigamit pagpatrolya sa kadagatan nga wa may kaugalingon nga mga sakyanan ang Kapitolyo?
* * *
Maayo ang lakang sa gobernador nga inay ipadayon ang panag-ilog sa probinsiya ug dakbayan kinsay tag-iya sa Fuente Osmeña magsabot na lang ang duha ka local government unit nga tabangan ang pagdumala niini. Dili tinuod makatabang ang panag-ilog kinsay angayang ilhon nga tag-iya sa maong luna. Pulos gobyerno ang duha ka partido nga nag-ilog sa ato pa katawhan pulos ang nanag-iya niini. Busa nganong lalisan pa man.
Ang maayong buhaton sa dakbayan ug probinsiya mao ang pag-umol og “joint management team†nga ma’y modumala aron mapalambo ang maong dapit. Kun duna ma’y mamahimong income sa umaabot gikan niini, bahinon sa probinsiya ug dakbayan.
Hinaut nga ang tanyag ni Davide maoy magsilbing sinugdanan sa kasulbaran sa kasungian nga nagsugod niadtong panahon ni kanhi gobernador Gwen Garcia ug kanhi mayor Tomas Osmeña.
* * *