Tan-awa ra gud unsa kadako sa kadaot nga namugna sa dunot nga taras sa mga buhatan sa gobyerno pagtuman sa labing batakan nilang gimbuhaton ug sa pagpasabot sa mga magbubuhis sa labing yanong kasayuran nga angay nilang mahibaw-an.
Sugilanon ni sa usa ka amahan nga nangita sa iyang anak sa niaging duha na ka tuig apan wa kakuha og bisan unsang tabang gikan sa gidangpan niyang mga buhatan sa gobyerno. Gipakaingon intawon niya nga may daotang nahitabo sa iyang anak ug nga hingpit nang mapasagdan ang iyang apo. Taga Isabela City sa Basilan ang amahan. Niabot sa Sugbo pagpangita sa tabang nga gihikaw sa mga buhatan sa kasadpang Mindanao.
* * *
Sa kataposan nilang sulti sa 35 anyos niyang anak lalaki duha ka tuig nang nilabay padung nang sakay ang iyang anak og barko sa Malaysia. Ang asawa sa iyang anak tua sab magtrabaho sa gawas ug walo na ka tuig nga wa kauli sa Basilan. Nagsige hinuon og pada og bayad sa matrikula sa iyang apo.
Tungod sa kahadlok nga may daotang nahitabo sa iyang anak, nidangop ang amahan sa Philippine Overseas Employment Administration sa Dakbayan sa Zamboanga. Apan igo ra siyang gipasa ngadto sa Overseas Workers Welfare Administration. Nga igo ra sang nipahibawo niya nga suspendido nang placement agency nga nikontrata sa iyang anak.
* * *
Inay tabangan pagsusi hain nang iyang anak, giawhag ang amahan sa OWWA pag-adto sa ulohang buhatan sa placement agency sa Intramuros. Apan nabalaka ang amahan nga masaag lang siya kay wa na man gani motubag sa duha ka landlines sa ahensiya.
POEA gyod unta maoy labing suhito nganong nasuspenso ang placement agency. Kay sila man maoy nihatag og lisensiya sa mga ahensiya pagpang-recruit og mga trabahante. Sama nga POEA say nakaila sa principal employer nga girepresentahan sa placement agency. Inay magpasahay dako gyod unta ang ikatabang sa OWWA ug POEA pagsusi unsay tinuod nga kahimtang sa gipangita nga anak.
* * *
Maong nagpalaban dayon ming Direktor Evelia Durato sa POEA sa Kabisay-an dihang nidangop ang amahan sa Arangkada sa DYAB Abante Pa Bisaya! Daghang salamat sa kamatinabangon ni Durato natubag ang tanang pangutana sa amahan.
Wa diay daotang nahitabo sa iyang anak. Padayon diay’ng nanakay og barko sa nagkalainlaing kanasuran sa niaging duha ka tuig. Nahibaw-an ni Durato gikan sa database sa POEA nga ang anak bag-o lang nisud og bag-ong kontrata ug padung nang mosakay og laing barko. Wa kasabot ang amahan sa iyang gibati ug wa kapugong sa paghilak sa tago. Kay dungan sa pagkahibawo nga luwas ang iyang anak nadiskubrehan sab nganong wa na mopauli sa Basilan ni manawag nila: Duna na diay laing pamilya nga giatiman.
* * *
Email: leo_lastimosa@abs-cbn.com