Brgy Marigondon, Lapulapu City

“Boss sa kadaghan sa shabu diri sa among lugar nganong wala pa man gyod na madakpi? Naa nay mga bata ug batan-ong mga babaye gigamit na sa pagpamaligya.”

BRGY SIMBAGO, PINAMUNGAJAN, CEBU

“Moreklamo lang gyod mi sa karsada namo diri sa sitio Candiis kay grabe na gyud kabati sige lang lunang sa tubig kun mag-uwan mura’g katamnan na gud og humay.”

BRGY LIPATA, MINGLANILLA, CEBU

“Nag-antos gyud mi sa kabaho sa aso nga mogawas aning panghaw sa bihonan daghan na kaayo namong mga anak ang gipang-ubo, maayo untang susihon kini’g maayo sa among municipal health office ug sa barangay.”

BRGY LOOC, DANAO CITY

“Ang among reklamo diri sa among lugar Sir mao kining karsada paingon sa Pulangyuta gusbat na kaayo wala man gyud ni mahatagi’g pagtagad sa mga opisyal sa barangay para maatiman.”

BRGY CALERO, LILOAN, CEBU

“Kanus-a man intawon ni masumpo ang kining illegal nga drugas diri sa purok talong kay midaghan na hinoon ang tulisan para ipalit og shabu, gikan ni sa Consolacion ang shabu nga gibaligya diri Sir.”

BRGY BULACAO, TALISAY CITY

“Naunsa na man tawon ning among lugar nga ang among basketball gym gihimo na man hinuong bodega sa kahoy gikan sa naguba nga mga tarima kuyaw kaayo madisgrasya ang magduwa.”

BRGY BASAK, GUIHULNGAN, NEGROS ORIENTAL

“Puwerte na man gyud kusoga sa shabu diri hasta swertres kusog sad kaayo nga gidumala aning magsuon diri, hinaut unta nga mahatagan ni’g dinalian nga pagtagad arun masumpo ning mga illegal nga kalihukan.”

BRGY MABINI, ORMOC CITY

“Sa district 4 grabe na ang pagpamaligya’g shabu kay bisan og adlawan nga dako plastar kaayo ang negosyo pero mga tanod magtan-aw ra man sad mura man og way nakita sa illegal nga binuhatan.”

BRGY OBONG, DALAGUETE, CEBU

“Sir naa may hardware diri nga ilang hollow block gihimong pader ang nakaapan kay way tarong nga kural, ang ilang abog ari man padung sa kabalayan labi na kung init kaayo delikado kaayo ang abog kay dolomite ra ba ni ilang balas.”

BRGY TABUNOK, SOGOD, CEBU

“Sa sitio Suba uno Sir kay kusog kaayo ang hantak hapit kada adlaw unya naa say baligya dihang shabu, lisod na silang madakpan kay naa man silay look-out kun naay magpadulong nga polis.”

BRGY T PADILLA, CEBU CITY

“Diri sa lower Lomar kining magpraktis nga mga drummer sa bag-ong dalan kay saba kaayo disturbo kaayo sa mangatulog, wala gyod kabadlong ang mga opisyal sa barangay ani nga nakahasol kaayo ni sa uban ang ilang gihimo.”

BRGY CANDABONG, ARGAO, CEBU

“Nagkagrabe na man gayud ang pagpamaligya’g shabu ug marijuana diri duol sa rehab, palihog intawun mi’g pabadlong aning mga tawhana Sir aron dili na kini modaghan pag-ayo.”

Alang sa inyong mga reklamo text lang sa 09163869202 / 09071678643