Wala g’yud ko masayop

 Tan-awa, wala g’yud ko masayop sa akong baruganan nga angay’ng tun-an g’yud pag-ayo sa DOTC Special Bids and Awards Committee ang background sa winning bidder sa P17.5 Bilyones nga pagmugna og world-class nga terminal building diha sa Mactan Cebu International Airport.

Bisan ang higala nako nga si Valeriano “Bobit” Avila, kulumnista sa The Freeman ug Philippine Star, miingon nga angay’ng mohimo gayud og makuti nga pagtimbang-timbang ang DOTC kun angay ba nila nga i-award sa GMR-Megawide Consortium ang mao nga proyekto.

Gawas sa lindog ni Bobit, ang isyu gihisgutan usab sa mga balita nga gipublikar sa Philippine Star. Ang mga Sugbuanon angay nga magpakabana niini nga isyu tungod sa report nga ang kontrata sa GMR pagdumala og airport didto sa Male Ibrahim Nasir International Airport gikanselar sa kagamhanan sa Maldives.

Dili angay’ng ibaliwala lang sa DOTC Special Bids and Awards Committee ang mao nga report. Matud sa mga opisyal sa GMR nga wala nila tagoa ang isyu sa ilang dukomento pagsalmot sa bidding sa P17.5 Bilyones nga proyekto.

Nangatarongan ang GMR nga ang pagkanselar sa kontrata pagdumala nila sa airport sa Male nagumikan sa pag-asumer sa bag-ong mga opisyal sa kagamhanan sa maong dapit.

Ang mga bidders gud giawhag man sa pagsumiter og Notarized Certification of Absence of Unsatisfactory Performance Record nga magtataw nga ang kompaniya walay kontrata nga gikanselar, gisuspenso sa milabay’ng lima ka tuig.

Buyno, anaa na karon sa mga kamot sa kadagkoan sa DOTC ang pagtimbang-timbang sa mga isyu kay dili maayo nga basta-basta na lang nga i-award nato ang daku nga proyekto kun dili kita makasiguro nga anaa kini sa maayong mga kamot.

Sa pito ka bidders sa terminal building sa Mactan Airport, ang GMR-Megawide maoy nakahatag og mas daku nga proposal -- P14.4 Bilyones. Apan dili kini maoy sukdanan nga abi kay ang maong consortium maoy nakahatag og daku nga kantidad nga kini na maoy angay’ng tugyanan sa proyekto.

Wala ko magpasabot nga supak ko nga ang GMR-Megawide maoy makakuha sa proyekto apan kinahanglan nga susihon pag-ayo sa DOTC ang ilang rekord kay basi sa mga report, duna pay ubang mga isyu nga angay’ng tan-awon.

Si Oliver Tan nga maoy chief financial officer sa Megawide gikutlo sa report nga masaligon nga maka-deliver sila sa gikinahanglan nga world-class airport diha sa Mactan. Ang pagbag-o sa terminal gituyo aron nga maka-accommodate kini og walo ka milyon ka pasahero sa usa ka tuig.