Maapektohan ang kalibutanong negosyo sa nasinati nga dakong kadaut sa lubi nga maoy resulta sa kabangis sa bagyong Yolanda sanglit sa tuig 2014 mokunhod man ang supply sa lana sa lubi nga gibaligya ngadto sa gawas sa nasud.
Si Yvone Agustin nga maoy executive director sa industry group sa United Coconut Association of the Philippines (UCAP) sa iyang pamahayag iyang gipadayag ang nasud nga Pilipinhon nag-supply og 40 porsiyento ngadto sa ubang kanasuran og lana sa lubi.
Ang maong gidaghanon sa lana sa lubi nga gitumod ngadto sa ubang kanasuran maoy masinati ang pagkunhod sa iyang gidaghanon niining tuig 2014 tungod kay daghan man ang punoan sa lubi nga pulos na unta namunga ug matag labay unta sa tulo ka bulan ang ilang pagpupo alang sa pagkupras apan gihurot man sa pagpangluka sa bagyong Yolanda.
“The effect of Haiyan will be seen next year, especially in terms of exports of coconut oil,†nagkanayon si Agustin sa iyang pamahayag dihang nahinabi sa tigbalita sa Agence France Presse.
Mitataw si Agustin nga coconut oil maoy usa sa mga nag-unang ingredient sa mga cosmetics, sabon, ug fuel ug lakip na usab sa giinom nga mga health drinks.
Dugang pa niya nga adunay mga nahibilin pa nga mga lubi nga wala matumba sa bagyong Yolanda apan nawad-an usab kini sa ilang palwa ug molungtad pa og tulo ngadto sa upat ka tuig nga maulian ug mamalik na usab kini sa pagpamunga.
Hinuon itugot sa Department of Environment and Natural Resources (DENR) ug sa Philippine Coconut Authority (PCA) nga ang natumba nga karaan na nga punoan sa lubi nga ipagabas ug ipatabastabas isip coco lumber dako kini og kapuslanan sa mga kabus nga molupyo kay magamit man kini nga mga dapat alang sa pagpatukod og mga panimalay. Dinhi sa nasud nga Pilipinhon maoy naila nga abunda sa tanom nga lubi ang sama sa Masbate, Samar ug Leyte nga maoy nasentro sa pagkusokuso sa bagyong Yolanda niadtong Nobiyembre 8 niining tuiga 2013.