Nganong di mahunong ang prostitusyon

Sa miaging semana, nakasuroy ko sa Ayala Business Center. Duna ko’y mga kliyente nga miimbitar nako’g panihapon sa usa ka native restaurant. Unya samtang naghulat mi nga iserbe among gi-order nga pagkaon, nagtan-aw tan-aw akong kliyente nga lalaki (bana’g asawa akong ka-dinner date) sa gawas sa kan-anan. May mga batan-ong babaye nga nagbarog-barog sa gawas.

“Mora mag mga pick-up girls” sa akong kliyente nga lalaki.

“Ako, di gyud ko maluoy anang babaye nga nagbaligya sa ilang lawas!” timang sa asawa.

Maong nahisgutan namo ang prostitusyon. Ug nakabungat ko’g pipila ka komentaryo mahitungod niini.

Daghang mga hinungdan nganong ang babaye masulod niining matanga sa propesyon. Dunay napugos lang. Sama sa gikidnap. Ug nahimong sex slave. Kini maoy labing pait. Kay napugos ang babaye ginamit ang kusog sa sindikato. Mao ni kasagarang gigukod sa balaud. Apan ang maayong hisgutan, kadtong boluntaryo, wa pugsa nga nipili niining matanga sa propesyon. Unya maglalis usahay ang bana’g asawa kay ang bana maluoy nila kay napugos lang kuno, tungod sa kawad-on. Ang asawa moingon, kadaghang trabaho nga tarong para sa babaye. “Gusto lang gyud og easy and fast money, with class” sa asawa.

Kasagaran ang ato gyung kultura, katilingban, mga tawo sa gobiyerno, mga politiko ug mga dagkong negosyante. Kay mo-patronize man sila niining matanga sa serbisyo. Kun dili para nila, para sa ilang mga VIP guests. Law of supply and demand lang gihapon. Kun dunay demand, duna gyu’y mo-supply. Kadtong matiguwang na nga call girl, wa nay market, mao na may mahimong “madame” mo-manage og mga batan-ong call girls. May mga freelancers ug may dunay casa.

Makaingon ko nga kultura, kay sa kinabuhi sa usa ka batang babaye, kun immoral ang palibot nga mamat-an niya, labing dako nga purohan, nga modako gyud siyang immoral. Kay may mga ginikanan nga mao mismo ang magtukmod sa ilang anak nga mahimong prostitute. Duna say igsuong lalaki. Duna say bana o uyab. Duna say mga higala o dautang barkada. Kana sang babaye nga gusto mogukod sa kahimtang sa mga higalang adunahan. Kana sa bisyo sa drugas. Aron mamintinar ang bisyo, ang babaye mosulod na lang sa hugaw nga trabaho aron makakuwarta.

Ang mentalidad sa babaye nga makatilaw na sa kanindot ining trabahoa, moingon man lang “You sell it, you still have it. You keep on selling it, you keep on having it.” Mao nay ilang giingong natural resources. Inexhaustible supply of sexual services. Tingali, labing taas nga serbisyo sa usa ka call girl, una matiguwang, mga trayente anyos. Unya mahimo na lang madame, kun di mamatay sa sakit nga venereal disease o ubang sakit.

Kasagaran sab gyud nga mga babaye nga mosulod ini, ganahan sab gyud og sex. Unya sila pay bayran. Busa, doble ang benefit alang nila sa ilang hunahuna. Ug wa na sab sila’y dignidad o respeto sa kaugalingon. O lubag, distorted o twisted ilang sense of dignity. Daghan pa gyung mga rason nga mosige sila. Sama sa ubang nasud, nga legal man kuno ang prostitusyon. Busa, makaingon sila, legal man diay didto, maayo diay.

Sa Bibliya, sab kun mobasa mo, dunay giingong temple prostitute. Sa simbahan mismo, dunay call girl. Si Magdalena, giilang puta. Unya best friend ni Jesus Christ. Usa sab na nga rason. Makaingon ang mga indayhilay, “Pinangga man diay ta sa Ginoo!”

Pero ako, moingon lang sab ko, nga si kinsa man ko nga mohukom nila? Ila nang kinabuhi. Kun sala o krimen man na, sila rang nagbuhat ang manubag. Busa, mahulog lang gihapon sa giingong “free will”. Freedom of choice. Kagawasan sa pagpili. Total ang nagpili mao ra may makastigo kun dunay kastigo.

Apan, mao lagi. Tataw nga next to impossible (ubos-ubos la’g diyutay sa imposible) nga mahunong ang prostitusyon. Naa may gustong mahunong. Mas daghan seguro ang gustong dili.