Student’s discount

Ang 20 porsiyento nga diskwento alang sa mga senior citizens ubos sa Senior Citizens Law gi-upheld kon gidasunan sa Korte Suprema.

Sa desisyon nga gipakanaug sa Korte Suprema di pa lang dugay, kini miingon nga ang 20 porsiyento nga diskuwento alang sa mga senior citizen ubos sa Republic Act 7432 nga giamendahan sa RA 9257 constitutional kon misubay sa konstitusyon o batakang balaud.

* * *

Si Ginong Anecito Batirol Sr.  sa Bohol nangutana: “Apil ba sa desisyon sa Korte Suprema ang 20 porsiyento nga diskuwento alang sa mga estudyante?”

Si Ginong Batirol nakapangutana pinaagi sa telepono tungod kay  sa balita nga iyang nabasahan wa may hisgut sa students’ 20 percent discount.

* * *

“Kining ako pagpakisayod lang,” matud sa atong magbabasa, “kay wa man ko’y nabasahan kabahin sa diskuwento sa mga estudyante. Gani wa na man ko masayud kun operational pa ba kining students discount.”

Ang buot ipasabot ni Ginong Batirol mao diay ang students’ fare discount diin dunay 20 porsiyento nga diskuwento ang mga estudyanteng pasahero sa bus o jeepney ba.

* * *

“Sa tinuoray lang, Sir, ang upat nako ka mga estudyanteng anak wala gayud makapahimus anang students fare discount,” suma pang Ginong Batirol.

Kay ngano man? Tungod kuno kay dihay mga higayon nga gipakauwawan sila sa drayber ug konduktor dihang nangayo sila sa ilang diskuwento.

“Sukad ato mobayad na lang sila sa pletihan nga way diskuwento-diskuwento,” matud pang Ginong Batirol.