Bistado

Nagtiyabaw nga miatubang didto sa Senado si Tacloban City Mayor Alfred Romualdez ug misugilon giunsa siya pagtratar ni DILG Secretary Mar Roxas ug sa nasudnong kagamhanan dihang siya nangayo og panabang tungod sa dakong kadaot nga nahiaguman sa iyang dakbayan gikan sa kapintas sa bagyong si Yolanda.

Matud ni Romualdez nga inay unahon ang pagtabang gimanduan hinuon siya nga mosuwat ug hangyoon ang national government nga maoy mohimo sa iyang gimbuhaton tungod kay dili na siya’ng kahimo niini.

Kuwang na lang hangyoon ni Roxas si Romualdez nga mo-resign sa katungdanan aron sila sa national government maoy mopuli sa pagdumala sa dakbayan. Si Roxas kusganong nanghimakak nga iyang gimanduan si Romualdez sa paghimo og suwat. Wala sab niya angkuna ang uban pa’ng pasangil sa mayor sama sa tataw nga pagpanghulga nga angayan kunong hinumduman niini nga siya usa ka Romualdez samtang ang presidente usa ka Aquino. Lawom man gud ang panagbingkil sa duha ka pamilya tungod sa koneksiyon ni Romualdez sa pamilyang Marcos.

Si Romualdez pag-umangkon ni kanhi unang ginang Imelda Marcos, ang asawa sa diktador nga si kanhi presidente Ferdinand Marcos.

Apan taliwa sa wala pag-angkon ni Roxas, mikatap diha sa Facebook ang video sa panagtagbo nila ni Roxas ug Romualdez diin tataw ang iyang mga gibuhian nga pulong ngadto sa mayor. Giingnan pa ni Roxas si Romualdez nga “bahala kayo sa buhay ninyo.”

Unsa ba gyu’y tumong ni Roxas nganong iyang pasuwaton si Romualdez? Politika maoy iyang motibo tungod kay dili nila kaalyado ang mayor. Mas gihuna-huna ni Roxas ang politika kay sa paghimo sa iyang obligasyon pagtabang.

Matud ni Roxas kinahanglan kunong mabutang sa legal ang tanan sa dili pa mosulod ang national government. Nakalimot siya nga ang Tacloban kabahin gihapon sa Pilipinas diin siya dakong opisyal.

Kun atong tubayan ang pangatarungan ni Roxas, buot niyang ipasabot nga dili mahimong motabang ang national government kun dili una moangkon ang local nga opisyal nga dili na niya kaya ang pag-atiman sa iyang dakbayan. Kun atong sundon ang iyang baliko nga paminsar, buot ba sab niyang ipasabot nga aron ma-legalize ang tanang tabang nga atong gidawat gikan sa ubang mga nasud kinahanglan sab nga mosuwat si Presidente Aquino ngadto sa pangulo sa ubang mga nasud o ba kaha sa United Nations og muangkon nga dili niya kaya ang pag-atiman sa kadaot sa bagyo aron tabangan ta?

Gipasiatab ni Roxas nga paspas ang pagresponde sa nasudnong kagamhanan sa trahedya. Apan nganong lima ka adlaw human sa bagyo dihang miabot ang international media mao may ilang naobserbahan nga daw way presensiya sa gobyerno didto sa Tacloban?

Kun duna may credible nga mohatag sa maong obserbasyon way lain mao ang international media. Dili minugna ang naobserbahan sa international media nga pagpangawat sa mga biktima sa bagyo sa mga tindahan.

Dili mahimong ipeke ang video nga nakuha diin giataki sa mga masuk-anon ug gipanggutom nga mga biktima sa bagyo ang usa ka dakong tindahan tungod kay way hinabang nga niabot didto nila. Diha man tingali apan labihan ka hinay sa pagpanghatag niini.  Tungod sa gihimo ni Roxas nahanaw na sa hingpit ang iyang kahigayonan nga mamahimong sunod nga presidente sa Pilipinas. Ambot og kinsay ganahan og presidente nga bisan sa dakong trahedya ug sa panginahanglan sa pagtabang mas giuna ang pamolitika kay sa iyang responsibilidad.

* * *

[email protected]