Sa akong ubos nga pagtimbang-timbang, dili tingali husto ang gihimo sa kadagkoan sa Department of Social Welfare and Development (DSWD) nga ang pagdumala ug pag-atiman sa mga bakwit nga taga Tacloban City itugyan na lang g’yud ngadto sa dakbayan.
Dili ko molalis nga ang pag-atiman sa mga ingon niini nga sitwasyon gi-devolve na sa mga Local Government Units (LGU)s apan kadto lang tingali nga mga lumulopyo sa mao nga lugar. Ingon niini nga mga lumulopyo gikan sa Leyte responsibilidad pa ba diay kini sa Cebu?
Wala ko moingon nga dili mohatag og pag-atiman ang kagamhanan sa dakbayan ngadto sa atong mga bisita apan kun itugyan na lang ‘sab sa hingpit ang tanan nga kaakohan ug pagkyugpos na lang ‘sab ang DSWD, dili na ‘sab tingali maayo.
Kay kining mga bakwit gikan man sa Leyte, alang kanako ang kadagkoan sa DSWD-Regional Office 8 nga nagbasi sa Tacloban, o kaha ang DSWD Central Office dili gayud mobiya sa ilang kaakuhan pag-atiman sa mga nanginahanglan.
Dili kay moingon nga kun wala na g’yuy mahimo ang usa ka LGU anha pa nga mobanus ang DSWD sa pagtabang sa mga bakwit. Kun lumulopyo pa sila sa dakbayan walay problema. Ang maayo nga buhaton nga magtinabangay gihapon ang DSWD ug ang mga LGU.
* * *
Nakadawat ko og mga text messages nga misuporta sa akong baruganan nga kun maglisud gayud ang kagamhanan sa dakbayan paghatag og dugang cash assistance sa mga senior citizens dili na usab tukma nga mamaligya na lang g’yud ta og kayutaan.
Ngano bitaw nga nagpatuga-tuga man kamo’g himo’g saad atul sa election campaign period nga himoong tag P10,000 ang cash assistance sa matag senior citizen karong tuiga unya dili diay makasapar ang kwarta.
Unya bisan og naglisud ang panudlanan sa dakbayan kay ang mga tax collectors wala makakolekta sa gikinahanglan nga kantidad, gipasakaan gihapon ang gahin para sa mga senior karong sunod tuig nga himoon na ‘sab kuno nga tag P12,000.
Daghan baya nga buhis nga kolektahonon sa dakbayan apan unsaon nga napakyas man si Mayor Rama sa pagtikdol sa sampot aning mga tax collectors mao nga hinay kaayo sila mangolekta.
* * *
Belated birthday greetings diay ni Stacey Marie Alesna nga nagsaulog sa iyang birthday kaniadtong Disyembre 6. Kini si Stacey Marie surveillance nurse ni siya nga nadistino sa City Health Department ug usa sa akong mga tinubdan sa balita.
Greetings gikan namo ni Ma’am Durinda Macasocol nga maoy assistant city epidemiologist.