EDITORYAL - Si Pacman librehon sa buhis tibuok kinabuhi?

Kun gihimo  kini  sa ubang  nasud, nga  ang  mga tawong  naghatag  og  makabungog nga  dungog  sa ilang nasud  di na pabayron og buhis, nganong  di man  mahimo  dinhi  sa Pilipinas.

Apan  tungod  ba  lang  sa maong katarungan  magkahiusa   na  ang  mayoridad sa  mga  magbabalaod  sa paghimong  balaod  niini?

Daghan  bayang  mga  tawo ang  may  mga  abilidad  sa  nagkalainlaing  aspeto  sa kinabuhi, apan  nangamatay  na lang  ang uban  kanila, nagpadayon  pagbayad  og  buhis.

Pipila  kanila  mao  ang  mga  artista, sama  kang Fernado Poe Jr., Dolphy,  sa  boksidor si anhing  Flash Elorde  ug  daghan  pa.

Unya  nganong  karon  pa lang  makahunahuna  ang  pipila  ka  tawo  aron  isugyot  nga  himoong  espesyal  si Pacquiao nga  di  pabayron  og  buhis.

Ngano  man  tungod ba kay siya  boksidor? Ang  mga  dagkong  negosyante  nga  nakatabang  pagpasaka  sa ekonomiya  sa nasud, unsa  man  librehon  usab  sila  sa buhis?

Kun  ang  mga  kabus  nga  mga  trabahante nagbayad  og  buhis  sa nasud, si  Pacman  na ba  hinuon  nga  maayo  kaayo  og kita.

Di  maayong  paagiha, tungod  kay ang matag  tawo   may kaugalingong  abilidad  ug  kun matag  Filipino  may abilidad sama  kang Pacquiao unya  di  na  pabayron  og  buhis aw  wa  nay buhis  nga  mahipos  ang  goberno.