Pagkaluoy sa mga nabiktima sa bagyong Yolanda. Nawagtangan na sila og mga kabtangan, mga kabanay ug namatyan, giusban pa gyod sila sa pagbiktima. Apan ning higayona dili na si Yolanda ang mibiktima kanila kun dili ang mga politiko na ug ang gobyerno nga namolitika sa ilang pagtabang sa mga nabiktima ni Yolanda.
Dili lang seguro ako ang nakamatikod, apil upod seguro ka sa nakamatikod nga bisan sa kadaghan sa mga hinabang nga nagabot-abot gikan sa mga lokal ug mga langyaw nga matinabangon ingon man daghang kanasuran sa kalibotan nga mitabang sa mga nabiktima ni Yolanda, daghan gihapon ang nagbagulbol ug nangindahay nga sila makadawat na og tabang gikan sa gobyerno.
Kini tungod sa rason nga ang mga wala makadawat og tabang gikan sa gobyerno mga molupyo sa mga dapit nga dili ka partido o dili kaalyado sa mga politiko nga nagpadagan o maoy nagdumala sa renda sa kagamhanan sa ilang mga dapit. Porbidang paita, gibagyo na, gipamolitika pa gyod ang mga biktima ni Yolanda.
Ang bagyong Yolanda mihatag og kahigayonan sa mga dato nga nasud nga makapakita sa ilang kadato pinaagi sa pagpadala sa ilang mga modernong kagamitan sa gubat sama sa Amerika, Britanya, Russia, China ug uban pa.
Ang Amerika mipadala sa ilang pinakadakong barkong iggugubat nga gikargahan usab og mga abyon nga iggugubat. Mao usab kini ang gihimo sa Britanya. Samtang ang China mipadala sa ilang pinakadakong hospital nga barko, mipadala usab sa ilang pinakadakong eroplano sa tibuok kalibotan ang Rusia. Mga modernong barkong iggugubat usab ang gipadala sa ubang kanasuran.
Ang nahisgotang mga modernong kagamitan sa gubat miabot sa Pilipinas kay naghatod og mga hinabang.
Ang pagtabang sa nahisgotang kanasuran sa Pilipinas duhay tumong. Una ang pagpakita sa ilang kusog militar ug ang ikaduha politika sa kanasuran sa kalibotan. Pero maunsa man ang ilang tumong, ang labing mahinungdanon, mitabang sila sa Pilipinas aron dali kining makabangon.
Busa bisan sa kaubos sa akong pagkatawo, ako nagpakatakos sa paghangyo sa nahisgutang kanasuran nga unta sa ilang pag- uli sa tagsa-tagsa nila ka mga nasud ila na lang untang ibilin sa Pilipinas ang mga moderno nilang mga kagamitan ug kahimanan sa pagpakiggubat aron aduna na usab kita niini kay sa pagkakaron ang anaa kanato mao ra gayod intawon si Raja Humabon nga magtakilid na kun magdagan tungod sa iyang katigUwangon ug ang bata-bata pa nga si Gregorio del Pilar pero luyahon.