Maayong ehemplo
Nagsugod na kagahapon ang unang adlaw sa pangatungdanan sa bag-ong mga napiling opisyal sa barangay ug laing termino alang niadtong mga nasublian sa pwesto. Sa unang adlaw sa katungdanan sa bag-ong mga opisyal managlahi ang ilang gihimo.
Dunay uban nga nisugod dayon sa trabaho, duna say uban nga nagpabadlong. Akong unahon ang pagsaludo sa bag-o namong konsehal sa Kalunasan nga si Jean Guinto tungod sa iyang gipakita nga maayong sinugdanan sa pagpangalagad.
Sa unang adlaw sa iyang pangatungdanan sa barangay akong naagian ang konsehala sayo sa buntag nga maoy nangulo sa pagpanglimpiyo sa daplin sa dalan paingon sa Langub Shrine nga dugay na kaayong wala malimpiyohi.
Gani gihimo na lang sad nga labayanan og basura sa uban ang maong dapit tungod kay gipasagdan lang kaniadto. Sa akong pag-agi kagahapon sa hapon, limpiyo na ang karsada. Hinaut nga magpadayon ang maong kakugi ug labaw sa tanan hinaut manakod ang iyang maayong ehemplo sa uban niyang kauban sa konseho.
* * *
Apan samtang dunay mga opisyal nga mipakita dayon og labok sa trabaho, duna say uban nga gipasanginlan nga nagpabadlong. Usa nila ang kanhi kapitan sa Day-as nga si Rey Cañada kinsa gidakop sa kapolisan tungod sa pasangil nga nagpabuto og armas niadtong Sabado sa gabii.
Ambot unsay hinungdan sa iyang pagpaboto, apan ang pasiunang kasayuran nga akong nahipos mao nga nakainom si Cañada. Kun tinuod nga nagmaoy ang kanhi kapitan tungod sa iyang kahubog hinungdan nga nagpaboto kini sa iyang armas, wala diay tingali masayop ang taga Day-as nga wala mohatag og higayon niya nga mopadayon sa iyang panerbisyo.
Si Cañada mipapili unta pagkakonsehal sa barangay human mapupos na ang iyang termino apan wala siya magmalampuson.
* * *
Disyembre na, apan ang kahinam sa kadaghanan alang sa mga Christmas Party nikagiw uban sa bagyong Yolanda. Kini tungod kay sagad sa mga kompaniya ug mga buhatan sa gobyerno mipahibawo na nga way party nga mahitabo karong tuiga.
Kini tungod sa grabi ka dako nga kadaot nga gibilin sa bagyo didto sa mga dapit sa Eastern Visayas ug bisan na sa amihanang Sugbo. Ang mga kompaniya ug mga buhatan sa gobyerno mas mipili nga ihinabang sa mga biktima sa bagyo ang gitagana nga kwarta alang sa party.
Usa sa mga misimpatiya sa gidangatan sa mga biktima sa bagyo ug mikanselar sa ilang party mao ang atong kapolisan. Gawas sa pagkanselar sa ilang party gipasiugdahan pa gyud nila ang usa ka konsyerto kagabii didto sa Mandaue diin ang kita ihinabang sa mga biktima sa bagyo.
Akong pagsaludo sa atong kapolisan. Mabuhay ang PNP!!!
* * *
- Latest
