May mga politiko nga sa ilang tan-aw mas perpekto sila kay sa ubang mga politiko busa sayon kaayong momandar nga paundangon na sa katungdanan ang sad-an nga politiko.
Unsa ba diay kabug-at ang kasal-anan ni Gobernador Davide nga paresaynon na man siya? Sa iyang bahin, mosanong kaha siya niini?
Ambot kagaan ba sa dila sa mga tawong nagtuo sa ilang kaugalingon nga perpekto busa wala dahoma nga ang kaliboan nga mibotar sa usa ka politiko aron mahimong gobernador, mandaran lang sa usa o duha ka tawo nga pabiyaon sa katungdanan kay may sipyat.
Kini gumikan lang kay wa maduaw ang ilang mga lungsod ug wa kahatdi og hinabang ang ilang mga molupyo nga nabiktima sa bagyo. Wa usab hinuon kita masayud kun gituyo ba kini sa gobernador o kaha may mahinungdanon siya mga lakaw hinungdan nga wa niya kahatagi og pagtagad ang pagduaw sa iyang mga alalay didto.
Kun iyang gituyo, aw usa ka dako niyang sayop, tungod kay ang mga tawo nga naa sa kahigwaos, kasakit ug kasubo gumikan sa nahitabo kanila nagkinahanglan og simpatiya gikan sa mga dagkong opisyal sa lalawigan.
Apan tungod niini angay diay siyang pa-resaynon? Ngilngiga gud.
Kun kamo maoy gobernador ug mandaran mo nga paresaynon gumikan sa maong sipyat, mo-resign diay mo?
Di diay siya mahimong kasab-an ning maong pagkuwang?