Dili man ko santos

Kun ugaling dunay mga healing sessions or Misa ug Hilog sa mga Masakiton, ang una dayon natong pangutana: “Kinsa man nang paria siya ba ang sikat nga Healing Priest? Nahulog na hinuon nga ang epekto sa gahum sa kaayohan nagasukad sa tawhanong katakus ug kabalaan.

Angay hinumdoman nga ang matag Santos nga Misa, makaayo ug dunay gahom. Kini ang dugokan kun nganong si bisan kinsang pari nga magmisa ug maghilog ang maka-epekto og kaayohan ug kaluwasan ni bisan kinsa. Kini tungod kay ang kaayohan ug kaluwasan iya sa Dios ug wala mag-agad kun balaan ba o dili ang tawo nga gihimong instrumento niini.

Kay ang pagtuo sa tawo uban sa grasya sa Dios dako kaayo og kahimoan nga masinati ang alibyo. Dugang pa, daw salikwaot pud sa usa ka pari nga mobalibad kun ugaling dunay moduol kaniya aron pangayoon ang kamanggihatagon sa pari pinaagi sa pagtapion sa mga kamot niini alang sa nagmasakiton uban ang kinasingkasing pag-ampo.

Kini ang kahulogan kun maghisgot kita og grasya. Si M. Scott Peck, M.D., sa iyang libro nga: Road Less Travelled ang nagkanayon: “But the reality of grace will remain unexplainable within the conceptual framework of conventional science and natural law as we understand it. It will remain miraculous and amazing.

Sa akong kasinatian sa matag higayon nga duna koy pagahilogan, ako lang ibutang sa akong hunahuna nga kining maong buhat pangalagad ang dili akoa. Hinunoa, iya kini sa Ginoo mao nga wala kaayo ako mahilansang sa akong pagkatawhanon ug sa akong mga kahuyangan.

Kay bisan pa man sa pagka dili angayan ang Dios mohimo og mga milagro. Ang matag usa kanato ang moingon: “Ginoo dili ako angay nga mopadayon kanimo, apan sultii ug ako mamaayo.”