Naggusbat sab sa bagyong Yolanda ang Baybay ug Biliran. Nahapay sab ang ilang kabalayan. Apan nakaikyas sa labing bangis nga santako sa bagyo ang ilang sistema sa tubig ug mga bay patigayon. Inay maneguro sa ilang kaugalingon, nakigsawo sila sa ilang tubig mainom ug inadlaw nga mga palaliton ngadto sa ilang mga silingan.
Matud ni Baybay City Mayor Carmen Cari, nakahatod na og tubig ang ilang water tanker ngadto sa mga lungsod sa Palo ug Tanauan. Ang Naval sa Biliran wa sab modawo sa abunda nilang suplay sa tubig ngadto sa lungsod sa Calubian ug uban nilang mga silingan. Gani ang daghang binotelyang tubig nga ilang nadawat gikan sa Kapamilya Relief Campaign ilang ihatod ngadto sa mas nagkinahanglan nga Tacloban City.
* * *
Sukwahi sa mga huhungihong nga gi-atake na sila sa armadong mga tawo gikan sa Tacloban, nga usa lang sa iresponsableng kasayuran nga wa kapugngi pagkatap tungod sa paghagsa sa mga linya sa komunikasyon sa Leyte ug Samar human sa bagyo, gihulagway ni Mayor Cari ang iyang lungsod nga nagsugod na pagbangon human sa katalagman.
Normal ang suplay ug presyo sa ilang mga produkto sa lana, abli ang ilang merkado ug mga tindahan ug abunda ang suplay sa ilang bugas, sud-an ug ubang inadlaw nga mga panginahanglan. Gani, salamat sa generator sa City Hall, nakasiga na ang suga sa ilang pantalan ug pipila ka kadalanan.
* * *
Di monopoliya sa Baybay ug Biliran ang mga sugilanon sa pakigsawo ug pagtambayayong. Atubangan sa kahadlok nga mas molapad pang kaguliyang tungod sa kalangay pag-abot sa mga hinabang ngadto sa mas daghang mga biktima sa bagyo, nagpabiling malinawon ang mas dakong bahin sa Silangang Kabisay-an.
May water refilling stations nga niabli sa ilang suplay ngadto sa tanang giuhaw nga way bayad. May mga kompaniya sa barko nga gawas nga nilibre sa relief goods ug mga boluntaryo nangabang pa gyud og dugang barge aron mas daghang hinabang ang mahakot.
* * *
Bisan 36 sa ilang kaubanan ang namatay, nasamdan ug missing, mga sundawo nga nahibilin sa Tacloban wa motalikod sa ilang katungdanan. Bisan nagkuray sa katugnaw ug nagguhay-guhay ang ilang uniporme, ang mga sundawo wa mosupak sa sugo sa ilang kadagkoan paghawan sa airport gikan sa nagsapaw-sapaw nga mga punoan sa kahoy ug mga tipaka sa napulpog nga buildings ug kabalayan.
Pagtukaw ug pagsakripisyo sa kasundalohan maoy hinungdan nga nakatugpa dayon ang C-130 cargo plane sa Philippine Air Force wa ray 24 oras human sa bagyo. Nga maoy nakapabarug sa dinaliang sistema sa komunikasyon human naputol ang tanang linya sa telepono ug nakahawan sa agianan sa usa sa labing lapad nga kalibotanong hinabang sa giisip nga labing bangis nga bagyo nga nakatugpa sa yuta.
* * *
Email: leo_lastimosa@abs-cbn.com