Sa wala pa ang Kristiyanismo, nahimong balansayon sa atong mga katigulangan ang pagsimba sa mga espiritu ingon man sa mga elementals sama sa mga engkanto, dwende, agta ug uban pa. Dili ikalimod nga bisan kun kita ang matawag nang mga binunyagan ang padayon gihapong nagbansay gihapon sa patuo-tuo. Bisan gani si Fr. Jose Francisco Syquia ang Direktor sa Buhatan sa Eksorsismo sa Artsidyosesis sa Manila ang nikomento man nga gawas mismo sa tugkaran sa Simbahan sa Quiapo anaa gihapon ang nagbansay sa occult ug uban pang sukwahi ug supak sa atong pagtulon-an.
Kun maghisgot kita og pangalagad alang sa kaayohan kon healing ministry, mosulod dayon sa atong hunahuna nga kini patuo-tuo na sab sanglit ang healing ato man dayong ilambigit sa mga Faith Healers, mga Espiritista, mga albularyo ug uban pa. Gani ang Hilog sa Masakiton ato man dayong sabton ingon nga katapusang alibyo niadtong himatyon. Kun adtuon sa pari ang masakiton hisaypan na man nato nga siya himatyon.
Diha sa pag-ampo sa masakiton inubanan ang paggamit sa mga sacramental sa simbahan, kita gitudloan man nga kini dili usa ka magic hinunoa usa kini ka pag-ampo diin sa espesyal nga paagi ang Ginoo nibubo sa iyang grasya ug kahupayan pinaagi sa pagpangalagad sa simbahan ug niadtong mga tawo nga natahasan nga mopadayon sa buhat sa Dios diha sa pagpangalagad alang sa kalingkawasan niadtong dunay balatian.