Basin kun magkamuritsing

Midagsa ang mga hinabang ngadto sa mga biktima ni bagyong Yolanda sa dakbayan sa Tacloban ug ubang dapit sa Eastern Visayas. Mapasalamaton kita og dako tungod kay hilabihan ka daghan ang mipadala sa ilang mga hinabang.

Bisan pa ang international community wala magmakuli sa pagtabang sa mga biktima. Gatusan ka libo ang nagkinahanglan karon sa atong tabang, ilabina sa pagkaon tambal ug kapuy-an.

Adunay dakong responsibilidad ang mga local government units alang sa hapsay nga distribusyon sa mga hinabang. Kinahanglan han-ay ang pamaagi aron nga mahatagan ang tanang nanginahanglan.

Basin baya kun adunay anomaliya na usab ang pagpanghatag sa mga hinabang sama sa nahitabo didto sa Bohol human sa makusog nga linog sa niaging bulan. Makauulaw kini kun mahitabo pag-usab gumikan kay nakatutok ang international community kanato niining mga panahona.

Kahinumdoman nga nag-away ang mayor sa usa ka lungsod didto ug ang mga tawo sa Philippine Red Cross tungod kay gusto niini nga ihatag sa PRC ang mga hinabang kay ang LGU na lamang ang mo-distribute. 

Apan wala mosugot ang mga kawani sa PRC. Gusto sila nga mao mismo ang mo-distribute. Hinungdan nga mitumaw ang dakong away tali sa duha ka habig ug paghawa sa PRC sa maong lugar.

Hinaut nga dili kini masubli pa didto sa mga lugar nga nagkinahanglan karon sa dakong tabang. Sa ka dako sa lugar ug sa kadaghan sa mga tawo nga apektado sa maong super typhoon, kinahanglan organisado ang sistema sa distribusyon sa mga hinabang.

Basin kun mo-starring na usab kining mga politiko ug magpaako-ako nga sila na lamang ang mo-distribute. Kini gumikan lagi kay gustong magpahumot sa ilang mga konstituwente aron ingnong nagpakabana.

Unsa na lamang ang ikaingon sa international community kanato? Basin baya kun mangyam-id sila kun ilang makita ang nagkamuritsing nga sistema sa distribusyon sa mga hinabang.