Usa ka pari sa apektadong dapit sa Samar samtang nagmisa ug nihatag sa iyang homiliya ang wala makatiwas. Ningaab ang iyang mga parokyano nga niadtong panahona mitambong sa Santos nga Misa. Ningaab sila ug nagdanguyngoy gumikan sa tumang kaguol sa mga nahitabo. Nagun-ob ang tanan apil na ang mga butang nga napundar nila. Apan wala kini magpasabot nga nagun-ob pud ang ilang mga pangandoy. Ang siga sa pagtuo angay’ng initon. Ang nahitabo gumikan ni Yolanda makapapukaw unta sa atong pagka-simbahan. Nga ang simbahan dili mao ang mga balay-alampoanan kun dili kitang mga tawo nga naghatag og kahulogan niini. Maingon nga si Kristo ang nipahimug-at dili sa kaanindot sa Templo kun dili sa kamanggihatagon sa matag tawo nga modawat ug maminaw sa mensahe sa kaluwasan ug kamatuoran. Balaan ang matag tawo ingon nga templo sa Espiritu Santo.
Kini ang hinungdan kun nganong ang matag binunyagan ang nanginlabot sa gidangatan sa mga isigka-magtutuo nga karon nahiagom sa mapintasong bul-og ni Yolanda. Wala man tuod ako makaadto sa mga dapit sa kadaut apan ang among parokya sa Our Lady of the Sacred Heart dinhi sa may N. Escario sa Kapitolyo naningkamot kutob sa mahimo kuyog sa among manggihatagong parokyano nga mopaambit sa bisan unsa nga anaa kanamo alang sa mga biktima sa bagyo.
Dili na kinahanglanon ang bisan unsang circular letter o bisan unsang awhag alang sa bisan asang parokya dinhi sa dakbayan sa Habagatang bahin. Sugo sa mando sa sentido komon ug sa tawhanong pagbati atong tabangan intawon ang atong mga nanginahanglang kaigsuonan.
Sa atong pagbarog sa yuta taliwala sa mga gusbat ug kadaut atong hinumdoman nga kining mga dapita balaan ug anaa ang Dios dinhi. Kay anaa ang Dios haom lamang nga ato siyang himayaon dili lang sa mga pag-ampo kun dili usab sa mga buhat sa kaluoy alang kanila nga nagdanguyngoy.