Baha sa tabang
Nibaha ang mga hinabang alang sa mga biktima sa bagyong Yolanda. Nagkadaiyang kahugpongan ug individual nga dunay dakong kasing-kasing sa pagtabang ang nag-ambahan pagpadangat sa ilang hinabang. Bisan ang ubang mga nasud sa kalibutan wala makatalikod sa panginahanglan sa mga Pilipino.
Basi sa talaan, duna nay nahipos nga kapin sa P2.5 bilyones nga kantidad sa mga hinabang ang Pilipinas ug gipaabot nga mosaka pa ang maong kantidad tungod sa padayong pagpangabot sa mga hinabang. Apan samtang nibaha ang pagpangabot sa mga hinabang, inanay pud nga namatikdan ang kakuwang sa sistema sa atong gobyerno aron mapaabot gilayon ang tabang sa mga nagkinahanglan.
Usa na ka semana karong adlawa sukad miigo ang makalilisang nga bagyo, apan daghan pa hangtud ron ang nangreklamo nga wala maabot sa tabang. Bisan ang mga sakop sa international media nga nituyo pag-anhi sa nasud aron pag-cover sa hitabo nakakumentaryo sa kalangan ug kakuwang og sistema sa atong gobyerno.
Si Anderson Coopers sa CNN nakamatikod nga dinhi sa Pilipinas labihan ka yaya sa atong gobyerno pagrespondi sa trahedya. Si Coopers nga nadiin-diin na sa pag-cover og mga katalagman wala makapugong sa pagtandi giunsa pagrespondi sa ubang mga nasud ang mga trahedya.
Bisan si Andrew Marshall sa Reuters sa iyang report mihulagway sa kakuwang sa pagpangandam sa nasud sa maong katalagman. Dili tingali hinuon husto nga nagkuwang ang gobyerno sa pagpangandam apan dili matago ang kakuwangan sa atong gobyerno sa sistema sa pagtubag sa panginahanglan sa tabang.
Usa sa nakapasamot sa problema mao ang pagkainutil sa mga Local Government Units sa mga dapit nga naigo sa bagyo. Nahimong inutil ang mga LGUs tungod kay sila pod mismo biktima man sa trahedya. Ang ilang mga opisyal lakip sa mga naigo sa katalagman. Gani dunay uban nga mga opisyal nga gitahong missing hangtud karon.
Sa ingon niini nga sitwasyon nga dili kasaligan ang LGUs tungod kay sila mismo biktima, makatarunganon nga ang national government na unta mismo maoy mo take over.
* * *
Lihitimo ang kabalaka sa usa ka negosyante sa Sugbo sa posibilidad nga ang mga Sugbuanon maoy mahiagom og pagkuwang sa suplay sa pagkaon kun magpadayon nga dili ma-replenish ang suplay sa pagkaon diha sa mga tindahan.
Si Regan King, pangulo sa disaster preparedness committee sa Cebu Chamber of Commerce and Industry, miingon nga nabalaka siya tungod kay basi sa iyang nasaksihan nahutdan sa baligya sa noodles, canned goods, ug bisan bugas ang kasagaran sa mga tindahan sa Sugbo.
Resulta ni sa pagdagsa sa mga nangompra aron ihatud isip hinabang sa mga dapit nga apektado sa bagyo. Matud ni King nga usa sa nakapabalaka niya mao ang suplay sa bugas. Kini tungod nga sumala pa niya nihit ang suplay niini sanglit wala na itugot sa gobyerno ang rice importation. Ang National Food Authority kon NFA hinuon mipasalig nga dunay igo nga suplay sa bugas.
- Latest
