Hadlokan nga mga Kapitan

Alang kanako dakung sayop ang pagpadayon pag-atiman niining mga “century-old” nga dagkong kahoy’ng acasia.

Kini diay’ng matanga sa kahoy kun magkadugay na, makahatag pa og kakuyaw sa kinabuhi sa katawhan. Wala ba kamo makabantay nga daghang mga kahoy’ng acasia nangapukan ug nangatumba sa bagyo?

Duna pa’y ubang kahoy’ng acasia sama diha atubangan sa Cebu City Hall nga sa milabay’ng katuigan mikalit lang og katumba bisan og walay kusog nga hangin.

Kaniadtong bagyo nga Yolanda duha ka dagku kaayo nga punoan sa kahoy’ng acasia ang natumba diha sa Plaza Sugbo duol sa simbahan sa Basilica del Santo Niño.

Ako’ng gisusi ang sitwasyon sa mao nga mga kahoy ug nasuta nako ang kapilegro niini kay daghan ang nagtoo nga abi kay daku kaayo ang punoan, lig-on kuno ang kahoy.

Wala sila makabantay nga ang maong matang sa kahoy kun magkadaku   malungag ang sulod niini. Ang kahoy duna kini dakung gamot nga maoy motidlom sa yuta ug maoy magpalig-on sa kahoy. Ang mga dagko nga kahoy’ng acasia wala na niining maong matang sa gamot. Nagbarug kining maong mga acasia pinaagi na lang sa iyang mga gamot nga anaa sa matag kilid.

Wala ba kamo makabantay nga ang higante nga acasia duol sa simbahan sa Mabolo naapil sa paglukapa sa bagyo? Gitan-aw nako ang duha ka dagku nga punoan sa acasia duol sa City Hall, kasudlan og tawo ang lungag sa tunga.

Mao kana ang rason nga wala nay lig-on ang mga kahoy’ng acasia kun magkatiguwang na ang kahoy. Asa ang imong palabihon, panalipdan ang mga “century-old” nga acasia o likayan nga adunay madat-ogan?

* * *

Nakasabot ko nganong ang mga kapitan sa barangay nga kaalyado sa Bando Osmeña Pundok Kauswagan (BOPK) misubli pagpanumpa atubangan ni Mayor Michael Rama bisan og nakapanumpa na sila niadtong Domingo.

Gusto sila nga makighugoy-hugoy usab sa mayor aron nga makakuha sila’g proyekto gikan sa kagamhanan sa dakbayan. Dunay uban nga nahadlok nga maapike kay basin sila’g dumtan unya. Pananglit ang usa ka kapitan, nakadungog ko nga ang iyang asawa anaa magtrabaho sa Cebu City Medical Center (CCMC), aw mabalaka g’yud siya kay basin og initan kini sa mayor kay tua siya sa pikas grupo.

Dunay laing kapitan nga ang iyang “scrap business” basin og maapike kay usahay ra ba mogamit kini sa karsada nga butangan sa iyang mga pinalit nga mga puthaw.

Ingon niana ang mga rason, personal interest. Angay g’yud tuod nga mahadlok ang mga kapitan kay kun initan kas mayor wala ka g’yuy bawot.