Panic buying!

Ato ning gisuwat sa wala pa ang bagyo ug maoy atong nasaksihan ang nagkalainlaing pangandam, both sa government ug sa private sectors. Gumikan sa kamoderno sa teknolohiya, at least, kahatagan kita’g igong panahon pagpangandam.

Sa unang mga panahon, wala kita’y higayon pagpangandam, hinungdan nga daku ang kadaot nga atong mahiaguman, sama sa pagkusokuso kanato ni Ruping.

Aduna kita’y igong panahon pagpangandam. Apan, Filipinos as we are, ang atong paglihok sa last hour na. Huwebes gabii, mao pay paglihok sa kadaghanan kanato, busa nag-panic buying tungod kay nagdungan kitang tanan. In my case, pananglitan, sa Martes pa, ug sayo sa Miyerkules, nagsugod-sugod na kog pamalit, busa, hayahay pa kaayo.

Walay panic buying atmosphere. Pagkagabii sa Miyerkules, naghuot na ang mga mall kay daghan na kaayo ang nag-last minute shopping. Ang kandela nga salin sa All Souls Day, nahurot, mga flashlight ug bateriya giilugan, ang estante sa sardinas nabakante.

Kadtong naawahi, wala nay cart ug mga basket nga magamit. Klaro kaayo … panic buying gyud.  Kini tungod kay nag-last minute gyud ta.  Ambut ngano.

Akong amigo naguol sa kahuyang sa ilang atop, kay iniglupad ini, ug ang tugpahan sa mga sin, mao nay tag-iya. Ambut unsa nga balaud ang gibasihan ini. Laing higala mitambag pagpatangtang daan sa atop, dili mohuwat nga si Yolanda ang mokanlat sa mga sin. Inig human sa bagyo, ilansang pagbalik ang atop, inay ang silingan nay makapahimulos ini.

Akong usbon, gumikan sa modern technology, taas ang atong panahon pagpangandam … busa kalikayan unta ang pag-panic buying. Dili maghuwat sa last minute.

* * *

Niay maayong balita. Actually, daghan kaayong mga maayong panghitabo sa atong nasud karon, labina sa natad sa ekonomiya, taliwaa, sa pork barrel controversy.

Pananglitan, ang Asian Development Bank (ADB) migahin og 75 bilyones ka pesos, pahulam sulod sa tulo ka tuig, gikan sa 2014 hangtud 2016. Atong mahulagway ang dakung pagsalig sa ADB nganhi sa atong nasud. Alang sa ADB, misalig sila nga dili kini kawaton ni Noynoy.

Unya, ang World Bank mismo miila sa atong nasud nga “it’s becoming a better place in the world to run a business.” Sa ato pa, maayo ning buboan og foreign capital ang Filipinas. Sa unang mga panahon gilikayan kita sa mga foreign investors.

Nahimutang ang atong nasud sa Top Ten countries nga matud sa World Bank mi-improve ang business climate. Kini, ug ubang mga favorable economic development sa atong nasud, nga waa manghitabo sa nangaging katuigan, naghulagway sa pagsalig sa international community sa atong national leadership. Ambut ngano nga duna may mga efforts somewhere (kinsa may nag-finance ini?) nga buot mopukan ni Noynoy?