Daghan sa mga langyaw ang nakauyon nga mopuyo sa Pilipinas. Kini tungod kay gawas nga mas barato ang atong palaliton kun itandi sa ilang nasud mas daghan sab ang nindot nga lugar nga mamahimo nilang kasuruyan. Apan unsa bay angayang buhaton sa usa ka langyaw aron siya makakuha og permanenteng Visa dinhi sa Pilipinas? Kana nga pangutana ang atong tubagon karon dinhi sa atong column.
Dear Atty. Divine,
Aduna koy boyfriend nga American National, nakabisita na siya makadaghan dinhi sa Cebu ug nakagusto siya nga mopuyo dinhi. Ang iya lang problema kay tungod kay tourist visa ang iyang gikuptan magsige lang siya og extend niini ngadto sa Bureau of Immigration. Adunay panahon nga kinahanglan pa siyang mo-exit sa Pilipinas kay misobra na siya sa gitugot nga extension . Ang gusto unta niya attorney nga mopuyo siya sa Pilipinas nga di na magsige og renew sa iyang visa, unsa may iyang buhaton? Mamahimo ba siyang mokuha og fiancé visa? Hinaut nga imong matubag ang akong pangutana. Daghang Salamat. —Nova
Dear Nova,
Kun ang tuyo sa imong American boyfriend permanente na nga mopuyo dinhi sa Pilipinas mas maayo gyud nga mo-apply siya og permanent visa. Usa sa mga paagi nga makakuha siya niini mao ang pagpakigminyo og usa ka Filipino basi sa Section 13 (a) sa Philippine Immigration Act of 1940. Ang Pilipinas walay fiancé visa apan adunay laing paagi nga makakuha sab siya og permanenteng visa. Kini naglakip sa 1) Special Resident Retiree’s Visa kon (SRRV) alang sa mga langyaw nga gustong mo-retire dinhi sa Pilipinas, 2) Quota Immigrant Visa ug 3) Special Visa Employment Generation (SVEG). Hinuon kining maong mga matang sa Visa nagkinahanglan og investment sa Pilipinas sa dili pa sila tugutan nga makakuha niini. Lain-lain og kantidad ang kinahanglan nga investment sama pananglit sa Quota Immigrant Visa nga nagkinahanglan og $ 50,000 nga investment. Hinuon kun kamong duha way kabilinggan nga magminyo ug nagkahigugmaay gyud kamo, mas sayon alang unya kaniya ang pagkuha og permanent visa dinhi sa Pilipinas kun magpakasal kamo. Hinaut nga akong natubag ang imong pangutana. Daghang Salamat.— Atty. Divine
Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa flores_divina@yahoo.com. ug akong tubagon ang inyong pangutana pinaagi sa akong column matag adlaw’ng Miyerkules ug Domingo.