Hagwa sa butanding
Dugay na'ng gidayo sa mga langyaw ug lokal nga turista ang gibantog nga butanding didto sa lungsod sa Oslob.
Mauwaw ko'ng moangkon nga mas una pa'ng nakakita ang mga taga laing dapit kay nako. Ug tingali sa mas daghan pa'ng mga lumad nga Sugboanon.
Salamat nga niadtong Domingo, atol sa ika-upat nga kasumaran sa adlaw'ng natawhan sa akong kamanghuran nakahigayon ming tibuok pamilya pagsaksi sa talagsaon ug maanindot nga gasa sa kinaiyahan.
Nalingaw ko nga nagsud-ong sa mga butanding nga matag karon ug unya mosapigad sa bangka nga among gisakyan.
Daw sa makighagwa kanimo ang dagkong isda nga nalingaw pagkaon sa gagmay'ng hipon nga gisabod sa mga mananagat nga nagsilbi na karon nga ilang mga magbalantay.
Lahi kay sa niadtong bag-o pa nadiskubrehan ang maong mga mananap, mas hapsay ug duna nay sistema nga gisunod ang kagamhanan sa lungsod pagsiguro nga maprotehian ang mga butanding.
Sa dili ka pa tugotan nga mosud-ong o ba kaha molangoy uban sa mga butanding kinahanglan ka una nga motambong sa mubo nga briefing.
Upat ka butang ang gikinahanglan nimong bantayan. Una di mahimong hikapon ang mga butanding. Ikaduha, di mahimong mogamit og flash kun buot ka mga mokuha og hulagway uban nila, ikatulo kinahanglan nga imong sundon ang upat ka metros nimong gilay-on gikan sa mga isda, ug ika-upat di ka mahimong mogamit og lotion o sunblock cream kun gusto kang molangoy uban sa mga balyena.
Gituyo sa kagamhanan sa lungsod ang pagpatuman niini aron masiguro nga kaprotehian sila. Dunay mga marine biologist ug mga bantay dagat members nga nagbantay.
Ang masakpan nga molapas sa mga lagda makabayad og multa nga moabot og hangtud sa P2,500 ug pagkabilanggo hangtud sa unom ka buwan.
Tungod sa pagdagsa sa mga butanding sa Oslob midasig pag-ayo ang turismo sa lungsod.
Nahimo sab ning tinubdan sa panginabuhi sa mga mangingisda nga karon di na kinahanglan maghago pagpanagat aron dunay ikapakaon sa ilang pamilya.
Sa ilang paghakot sa mga turista nga buot mosud-ong sa butanding, matag usa nila mokita og labing minus P200 ang adlaw isip bahin sa kita.
Ang mga mananagat modawat og 60 porsiyento sa kita samtang ang nahabilin nga 40 porsiyento bahinon sa lungsod ug barangay. Matag usa ka turista nga motan-aw sa butanding kinahanglang mobayad og P300 samtang kadtong buot molangoy uban sa mga balyena kinahanglan mobayad og P500.
* * *
- Latest
