Matag Kalagkalag, sama sa Semana Santa, Pasko, Bag-ong Tuig ug ubang mga higayon nga magkadungan og pamauli ang mga pasahero sa kalungsoran ug ubang lalawigan, masinati gyod ang labihang kanihit sa buses sa terminals ug barko sa mga pantalan. Di ni timaan sa tinuoray’ng relasyon tali sa gidaghanon sa mga sakyanan ug mga pasahero kay di man kasarangan ang pagsulbong sa demanda.
Di mosugal ang mga bus operators ug mga tag-iya sa barko pagpangompra og dugang mga sakyanan. Kay nahibawo man silang langawon lang sa mas daghan nga kasarangang mga adlaw sa tuig. Apan di sab mahimo nga wa na lang gyo’y himuon paglikay sa pagkatanggong sa mga pasahero sa mga adlaw nga magkadungan sila og biyahe.
* * *
Di paigo ang dugang buses ug bisan ang nagpapakyaw nga PUJs nga gitugotan ni Direktor Ahmed Cuizon sa Land Transportation Franchising and Regulatory Board-7 pagbiyahe gawas sa ilang naandang mga ruta. Kay di man sab mahimong pasimangon ni Cuizon ang mas daghang sakyanan sa way paghikaw sa mga pasahero sa ubang mga ruta.
Nakatabang pag-iban sa natanggong nga mga pasahero ang pagpakatap ni Gobernador Junjun Davide ug sa mga mayor sa kalungsoran sa kontrobersiyal nga Suroy-Suroy buses. Hinaot nga mas kapangandaman sa lokal nga mga opisyal ang susamang pagsulbong sa mga pasahero sa umaabot nga tingbakasyon.
* * *
Gipalili ko ni Direktor Arnel Tancinco sa Land Transportation Office-7 unsa kadaghan ang mga pasahero sa Kalagkalag: Sa North Bus Terminal sa Dakbayan sa Mandaue, 429 ka buses ang nakalarga gikan sa alas-2 sa hapon sa Huwebes, kanus-a gibuhian sa pribadong mga kompaniya ug mga buhatan sa gobyerno ang mga kawani, hangtod sa alas-2 sa kadlawon sa Biyernes. Sa ato pa, 35 ka buses ang nakalarga matag oras, o usa ka bus matag duha ka minuto.
Kun ang matag bus may 50 ka pasahero, 21,450 ka pasahero ang nahakot sud sa 12 ka oras, o 1,787 matag oras, o 30 ka pasahero matag minuto. Mas daghan pa gyong mga pasahero nga nangagi sa South Bus Terminal sa Dakbayan sa Sugbo.
* * *
Nipasabot si Cuizon sa DYAB Radyo Patrol nga wa sila magpaabot nga ingon ini kadaghan ang mga pasahero sa Kalagkalag. Way klaseng mga tinun-an sukad sa linog niadtong Oktubre 15 busa hagbay rang nakapauli. Way trabaho sa piniliay sa barangay niadtong Oktubre 28 ug daghang nananghid sa mga kompaniya nga unya na mamalik sa trabaho sa liwas sa Kalagkalag.
Mahimong mas daghan na lang gyong mga molupyo sa Sugbo, salamat sa pagpanguhong sa mga kompaniya ug mga industriya nga nakapadani sa mga trabahante sa kasilinganang lalawigan. Tingali may sukaranan nang mas malungtaron nga pagdugang sa mga sakyanang pamasahero.
* * *
E-mail: leo_lastimosa@abs-cbn.com