Nindot nga hitabo atol sa kalamidad

Adunay mga butang nga makit-an taliwala sa trahedya nga manghitabo.

Makita sa bisan asa nga suok ang panagtinabangay human sa kusog nga linog didto sa Bohol nga mitay-og sa tunga-tungang Kabisay-an.

Ang mga negosyante mikuot gyud sa lawom nilang bulsa aron mohatag og pila ka milyon alang sa relief operations ngadto sa mga lungsod sa Bohol diin adunay mga residente nga hapit na wala’y gikaon human sa linog niadtong miaging semana.

Mga pribadong indibidwal, grupo ug mga lokal nga kagamhanan mihimo og fund-drive ug relief goods gathering aron ipadala didto sa Bohol.

Ang mga dagkong foundations, sama sa The Freeman Foundation mihimo usab og mga pamaagi nga makatabang ngadto sa Bohol pinaagi sa pagpanawat og mga donasyon alang sa mga biktima sa linog.

Nindot kaayong palandungon nga adunay ingon niining mga talan-awon nga nanghitabo – ang pagpakita sa atong mga pagka-Pilipino, ang pagkamatinabangon.

Apan medyo subo nga palandungon nga mosuol ang atong pagkamanggihatagon sa panahon sa trahedya tungod kay ang Ginoo nagtudlo kanato sa pagkamanggihatagon sa tanang panahon. Mao bitaw nga adunay panultion nga “every day is Christmas” aron pagpahitabo sa pagkamanggihatagon sa tanang adlaw.

Usa usab sa makaguol nga sitwasyon mao ang pamolitika sa mga politiko panahon sa kalamidad.

Mga dagkong politiko mosuroy dayon sa mga lugar nga maigo sa kalamidad ug magpahulagway dayon sa mga biktima nga makaluluoy kaayong tan-awon.

Lud-on kitang magtan-aw sa ilang mga hulagway diha sa mga pamantalaan, apan nanghitabo kini hapit sa matag trahedya nga mahitabo sa atong nasud.

Adunay mga politiko usab nga mopahimulos sa kahigayonan pinaagi sa pagpanghilabot sa mga hinabang alang unta sa mga biktima sa trahedya. Aduna gyuy ingon niining mga tawo nga wala’y puangod taliwala sa kahimtang sa ilang mga konstituwente.

* * *

Ang labing makalagot nga sitwasyon kun adunay mahitabong trahedya sama sa bagyo ug linog mao ang kalibog sa mga tawo niining pagsuspenso sa klase.

Wala gyu’y laing kasandigan ang mga tawo pagpakisayod kun suspendido ba ang klase o wala, mao ra gyud ang media.

Apan magkalahi usahay ang impormasyon tungod kay walay klaro kun kinsa gyuy awtorisadong mosuspenso sa klase.

Laing kalibog mao ang lahilahi nga desisyon, kay usahay suspendido ang klase sa mga pampublikong tunghaan, apan padayon ang klase sa mga pribadong tunghaan.

Ngano man? Mas kuyaw matabonan ang mga tinun-an sa pampublikong tunghaan kay sa mga tinun-an sa pribadong  tunghaan kun adunay linog?

Alang nako, panahon na nga klarohon ang palisiya niining pagkasuspenso sa klase ug kinsay angay mopahibalo niini ug kanus-a kinahanglang ipahibalo.

* * *

Na-shock ko nga nagsud-ong sa usa ka dokumento nga akong nadawat.

Kining maong dokumento nag-ulohan og “All Offices Under the Office of the City Admin, Maintenance and Other Operating Expenses – Prior Years.”

Sa ika-10 nga item, akong nakita ang “Reimbursement of phone bills since 2005 up to 2012.”

Unya sa wala nga bahin nakita ang ngalan ni Kongresista Bebot Abellanosa.

Sa tuo nga bahin mao ang kantidad nga P187,063.23.

Kun kining dokumento nagpasabot nga si Bebot nagpa-reimburse sa iyang mga bill sa telepono gikan sa 2005 ngadto sa 2012, nganong gisakay man kini sa budget alang unta sa buhatan sa City Administrator?

Aron matabonan kini gikan sa pagpanukiduki sa mga sakop sa konseho ini’g budget hearing?

Dili ba nianang mga panahona, konsehal pa man si Bebot Abellanosa sa south district?

Kun konsehal pa siya nianang panahona, ang bill sa telepono angayan adto kuhaon sa budget sa konseho, partikular sa budget sa iyang buhatan.

Apan nganong wala man kini mapa-reimburse sa iyang panahon isip konsehal?

Kun karon lang gipangayo ni Bebot ang reimbursement, wala ba kaha kini makalapas sa auditing rules?