Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Daghan ang nag-ingon nga wala’y gipili ang dili pa lang dugay nga nahitabong linog sa nagkadaiyang dapit sa Kabisay-an sama sa lalawigan sa Sugbo ug lalawigan sa Bohol gumikan kay ang mga karaan nga mga simbahan ug bag-o pa lang nga gitukod nga mga pribado ug gipanag-iya sa gobiyerno lakip man sa nakasinati og kadaut nga nakaingon nga daghan naangol ug milakas pa og mga kinabuhi.
Sa lalawigan sa Bohol maoy gikataho nga ang mga simbahang Katoliko nga gitukod nga gatusan na ka tuig ang nakalabay nga nagpabilin pa unta nga nagbarog bisan sa nahitabong pagpamomba sa panahon sa Ikaduhang Gubat nga kalibutanon apan wala na gayod kini makasugakod sa nakalabay nga nahitabong linog.
Ang mga karaang simbahan dinhi sa Sugbo nga nahimo na nga tourist destination sa mga langyaw nga mga bisita nga nahimutang sa kalungsoran ug mga dakbayan wala gayod makalingkawas sa nahitabong linog sanglit nakasinati man kini og mga kadaut.
Ang kampanaryo sa simhanan sa Santo Niño nga gipatukod sa panahon pa sa mga karaang katoliko daw nakapahingangha kaayo tungod kay nahunlak man kini ug nabungkag sulod lang sa pipila ka gutlo nga pagtay-og.
Ang edipisyo sa Cebu City Medical Center nga nahimong dangpanan sa kabus nga mga pasiyente sa dakbayan sa Sugbo maoy giluwatang hukom sa mga structural engineers nga naghimo og pakisusi ang hingpit na lamang gayod nga pagtak-op kay kuyaw man og matiwas na hinuon ang mga pasiyente nga pagpatambal niini nga giaprobahan usab ni Mayor Michael Rama.
Ang merkado publiko nga giplano sa panahon pa sa katapusang termino ni Board Member Thadeo Ouano dihang siya pa ang mayor sa dakbayan sa Mandaue nga naabtan na sa pagkatapus sa iyang termino ug gipadayon ni Mayor Jonas Cortes pinaagi sa pagpatukod niini ang nakasinati usab og mga kadaut.