Oktubre 20, 2013: Ikakawhaag siyam nga Domingo sulod sa tuig (Domingo sa Misyon)
Mga Pagbasa: Ex. 17;8-13/Sal. 12 1/2 Tim. 3;14-4;2/Lk. 18;1-8
Tinukmod sa dakong panginahanglan
Sanglit wala’y lalaki nga nanalipod ug niatiman kaniya, ang biyuda sa atong ebanghelyo karong Domingoha ang personal nga niduol ug nihangyo sa maghuhukom kansang taras walay pagpakabana. Apan gumikan sa peer pressure sanglit ang maong paghangyo ang gihimo man atubangan sa kadaghanan. Kun ang maong wala’y hinungdang maghuhukom ang mitabang unsa na kaha ang atong langitnong Amahan?
Sa nilabay nga linog bisan pa man sa daghang mga kadaut nga nahatag ang maong katalagman ang nakahaling gihapon sa pagtuo ug paglaum nga ang Dios wala magpasagad ug maghinan-aw lamang sa atong tawhanong kahimtang. Nangagupok man tuod ang mga simbahan apan ang mga imahen nga wala madaut (sulagma man o dili) ang nagpahinumdom nga anaa ang bidlisiw sa paglaom.
Ang mahinungdanon mao anaa ang pagtuo ug ang pagkamakanunayon.
Dili usa ka silot ang maong linog kay kabahin lamang kini sa liyok sa kinaiyahan nga kitang mga tawo kabahin sa usa ka sistema sa kinaiyahan. Hinuon magpaamgo unta kini kanato nga angay kitang magpakabana sa atong kinaiyahan.
Kabahin sila sa atong kinabuhi ug kita usa kanila. Tinukmod sa dakong panginahanglan sa uban natong mga kaigsuonan angay kitang manginlabot dili lang sa mga materyal nga butang kun dili usab sa atong mga pag-ampo.