Aron di magkabuwag

Adunay manag-uyab nga nadala lang sa kinidhatan o malulot nga tinan-awan. Dali ra nagkasabot ang ilang pagbati. Nga gisugniban sa grabeng makahilanat nga kaibog.Dihang nahuwasan sa kahinam sa pakigseks, diha pa  nakaamgo, nga nalimtan nilang ipaila ang kaugalingon. Wa pa gani sila magkainilhanay kun si kinsay ilang mga ngalan. Ug gipahinaykan na lang pud, samtang adunay kainit.

Tungod kay gipaundayonan na lang sa pagbati ang pagsinabtanay sa ilang relasyon, nga wala masuhito sa isig nila ka hiyas o pagkatawo, way purohan nga kini may pundasyon aron nga molig-on. Magkaanam ka bugnaw ang hilabihang kainit sa ilang gugma,kay may gipangita kang panginahanglan diha sa aspeto nga tawhanon. Ingon sa nawala na ang iyang dugam-is  dimdimon ang gugma. Apan di maayo kun kini lay hinungdan nga magkabuwag mo.  Mangita mo’g pamaagi kun buot mong molig-on ang inyong relasyon. Sulayi kuno ni…..

(1.) Isipon permi ang nindot nga atraksyon sa imong paris – Pinaagi niini makahinumdom ka sa mga hiyas niya nga nagustohan mo. Pangandoya ang matam-is nga higayon nga mabati pag-usab idaitol ang kainit sa lawas.

(2.) Manuroy mo – Sa mga dapit nga mabulokon alang sa inyong mga gugma. Kanunay mogawas aron paghugot sa bakos sa inyong pagminahalay.

(3.) Mag-estoryahay – Mahimong dili mo matagad ang uban, apan ayaw lag buhata sa paris mo. Permi mo siyang estoryahan. Ipahayag nga may laing nakagusto o naibog nimo. Dinhi masukod ang gugma niya kanimo. Iya kang gakson nga di mailog sa uban. Maoy panaad sa nindot ninyong panag-uban.

(4.) Maglikay sa uban – Kun sa pamati mo dali ka ra kaibgan sa babaye o lalake ayaw na la’g pahinayak og duol nila. Likaye ang pag-adto sa kalingawan, kun moadto man, ikuyog ang paris aron di ka makursonadahan sa maibog nimo.

(5.) Ayaw  makigpanuroy sa uban – Kun may imbitasyon balibaran sa maayo nga pagpasabot. Kun di mosabot, tun-i ang pagpahilayo kaniya.

Dili sayon ang pagpabalik sa kanhing kainit nga gidangilag sa isig pagbati sa inyong mga gugma. Apan kun parehong magtinabangay sa hugtanong pag-inuliay, aduna gayu’y paglaum nga mas monindot pa nga matagamtaman ang kalinaw ug kalipay diha sa inyong relasyon.