Tungod sa aneurysm nga miatake ni Condrado Fulgencio, dealer sa Casino Filipino-Cebu, PAGCOR, nakabsan gyud kini sa iyang kinabuhi paglabay sa duha ka bulan nga pagpakigbugno sa naasoy’ng traydor nga sakit.
Nahurot ang ilang kabtangan ug salapi gumikan sa maong mahalong sakit, diin ultimong usa ka bag nga dugong tipo A, wala na sila’y ikapalit. Ug kay wala kaabunohi dayon, natipi ang pasyente.
Ang asawa ug mga anak gibiyaan sa dayon ni Condrado nga naputos sa utang ug napuno sa kaguol. Nag-edad pag 9 ang ilang kinamanghorang liwat, kinsa anaa pa magtungha sa elementarya ug nagkinahanglan pa unta’g taastaas nga ayuda pinansiyal gikan sa mitaliwan nang amahan.
Si Engr. Andrew Muaña, Pit Manager sa CF-Cebu, kinsa bag-o lang gi-bypass, gibati’g dakong kaluoy sa iyang kumpare Condrado, kinasingkasing nga mi-offer sa iyang St. Peter Memorial Plan worth P50T nga lungon aron may kasudlan ang patay’ng lawas sa suod nga higala.
Nahapagakos ang asawa sa namatay ngadto sa enhinyero, kinsa bisa’g lugos pa makalakaw (nag-istratsis lang), miadto gihapon personal sa haya sa ilang kauban sa trabaho.
“Mapapasaya nyo po talaga si Condrad dahil sa ginawa mo, sir Andrew. Tunay na kaibigan ka talaga!†sa misis pa sa namatay nga durong patulo sa iyang mga luha.
Si Engr. Andrew Muaña mao kini kadtong naoperahan sa kasingkasing og quadruple by-pass didto sa Chong Hua Hospital, Cebu City, nga gimilagrohan sa Birhen sa Regla, diin ang kinatibuk-ang estorya na-feature sab dinhi sa Banat News.