EDITORYAL - Mamumuhis nangayo’g tax break

Wa  sa balaod sa Pilipinas ang pagpabakasyon  og  bayad  sa buhis  sa mga  trabahante  tungod    kay  gipangawat   ang  atong buhis    sa  mga  opisyal  sa gobiyerno.

Natawo  kita  sa kalibotan  nga  may tulubagon  sa pagbayad  sa  buhis  nga  gipatuman  sa atong  balaod.

Mao kini  ang  silbing  abangan  sa matag  tawo  nga  buhi  dinhi  sa yuta  tungod   kay  ang  buhis  gipaningil kini  sa  matag  nasud, aron modagan ang  kagamhanan  nga  may mga  proyekto usab  nga  ikauli  ngadto  sa iyang  katawhan.

Busa  tungod  kay sagrado  nato  kining  katungdanan, ato  kining  tumanon,  kay  di  mahimong  ang  sala  dugangan  nimo  og  laing sala .

Kun  ang  mga  opisyal sa  gobiyerno  gisayonan  ra  sa pagkawat  sa  kuwarta  sa kagamhanan,  di  ingon  nga  ilang  kaunon  kay  gutom sila.

Kundi  aron  labi pa silang  modatu bahala  na  ang  minilyon  ka  mga  hamtong  ug  kabataan  nga  nanghingutas  sa kapait  sa kahimtang  nga  hapit  way  makaon  matag adlaw.

Kitang  mga trabahante, bahala  na  og  mamatay  sa panarbaho  basta  mabuhi  ta  nga way  gitikas  nga  katungdanan  ug obligasyon  ngadto sa gobiyerno.

Kun  silang  mga  adunahan,  labing  makuwartahan  tungod  sa pangawat, pasagdi  sila  kay  sa kaulahian  sila  ra  usab  ang  mag-ugtas  sa silot  nga  ipahamtang  sa  labaw’ng  hukmanan  sa itaas.   Mahimong  tugob  sila  sa kalipay  dinhi  sa yuta  kay  anaa  na  kanila ang  tanan, apan  temporaryo  lamang  ang  tanan.