Makapanimbawot sa balahibo kining usa ka report nga gisudlan na sa illegal nga druga ang pulitika sa pipila ka barangay dinhi sa dakbayan sa Sugbo.
Seryoso kining maong taho. Ug angay kini nga seryosohon usab pagsusi sa otoridad.
Si kanhi kongresista Tomas Osmeña mibutyag nga adunay walo ka barangay sa dakbayan ang hotly contested tungod sa presensiya sa druga. Kining mga barangay atua nahimutang sa south district, ang balwarte ni Osmeña.
Hinuon dili mokonpirma ang kapolisan niining maong taho sa narco-politics sa kabarangayan. Apan wala usab sila mihimakak niini.
Igo lamang silang mikonpirma nga naa gayud ang druga sa mga barangay sa dakbayan. Kini basi usab sa ilang kanunay nga monitoring.
Dakong posible ang presensiya sa narco-politics sa kabarangayan. Kini gumikan sa laganap nga druga nga morag dili na gayud masulbad sa kapolisan.
Daghang notoryos nga mga barangay tungod sa druga. Ang Pasil, Ermita ug Duljo-Fatima maoy pipila lamang sa mga lugar nga grabe ang paghitak sa maong gidiling butang.
Ug dili layo ang posibilidad nga sakyan niadtong mga drug dealer ang pulitika ning maong mga barangay pinaagi sa pagduol sa ilang gustong kandidato.
Ug kinsa bay kandidato nga mobalibad? Ilabina kun tingalon sila og binultong salapi alang sa ilang kadaugan?
Morag insakto sa iyang pangagpas si Osmeña. Ug kun unsaon pagpuhag kining narco-politics, kini maoy dakong problema sa kapolisan karon.