Usa sa mga negosyante sa Sugbo ang mitawag nako aron pagpaabot sa reklamo sa mga truckers batok sa usa ka opisyal sa kapolisan dinhi sa dakbayan nga giingon nga nangayo og P10 mil ngadto sa P15 mil matag buwan gikan sa matag-usa ka tag-iya og trucking business aron dili dakpon ang ilang mga sakyanan.
Pasayloa nga akong taguan ang pangalan sa negosyante alang sa iyang siguridad ug aron paglikay nga gukdon ang iyang negosyo sa maong opisyal sa kapolisan. Aron pud paghatag og higayon sa maong opisyal sa kapolisan nga mohunong na sa iyang pagpangilkil, tugoti nga pugngan ko una ang iyang pangalan.
Apan niabot na sa buhatan sa Police Coordinating and Advisory Council kon PCAC ang maong reklamo. Gani ang pangulo sa PCAC nga si Eugene Elizalde miingon nga ilang ipaabot ngadto ni Cebu City Police Director Noli Romana ang maong problema.
Dili man gud husto nga kilkilan sa mga opisyal sa kapolisan ang mga negosyante, labi pa kun lihitimo ang negosyo niini. Kun duna say kalapasan nga nahimo ang mga tag-iya og trucking business nganong dili man ninyo dakpon sa hustong pagdakop ug pamultahon inay nga inyong pangayoan og binuwan nga protection money.
Ang kasayuran nga akong nadawat nagbutyag nga kadtong mga tag-iya og truck nga wala mosanong sa gipangayo sa opisyal, kanunay intawo’ng giatangan ang truck niini ug gilisudlisod.
Hinaut mahatagan og pagtagad sa labing daling panahon ang maong reklamo.
* * *
Gubot pa’s lukot ang pagdumala ni Commissioner Ruffy Biazon sa Bureau of Customs, ang usa sa mga ahensiya sa gobyerno nga atong gisaligan paghipos og buhis. Kini tungod sa wala magkadimao niya nga pagdumala ug kakuwang niya sa hibangkaagan.
Mao ni resulta sa pagtudlo ni Presidente Aquino og opisyal nga dili ibasi sa qualification. Unsa man gud intawo’y nahibaw-an sa pagpadagan sa Customs sa usa ka tawo nga gradwado sa kursong Medical Technology kon Medtech.
Timailhan sa ka ignorante ni Biazon sa iyang trabaho, iyang gibalhin ang tanang opisyal nga nagranggo og collector 5 ug 6 ngadto sa usa ka ahensiya nga bag-ong gitukod ubos sa Department of Finance. Ug maoy iyang gibutang sa mga gibiyaan nga pwesto sa mga collectors ang dili kwalipikado sa pwesto.
Ang nakadaot kay iya kining gihimo sulod na sa election ban nga nagsugod niadtong Septembre 28. Resulta gipugngan siya sa korte pinaagi sa usa ka Temporary Restraining Order kon TRO. Kun tinuod nga reporma ang gusto niyang ipatuman, ang angayang gibuhat ni Biazon mao ang pagpasaka og kaso sa mga opisyal nga sa iyang tan-aw nangurakot ug nagpahimulos sa pwesto.
Dili kaha nga iyang gibalhin ang tanang collectors gawas sa customs aron ibutang sa pwesto ang iyang kaugalingon nga mga tawo pagtigom og pundo alang sa iyang gipaabot nga pagbalik sa politika human unya sa termino sa iyang padrino nga si Presidente Aquino?