Silang Lando ug Nitang

Magtiayong Lando ug Nitang nagkinahanglan og disenteng pinuy-anan. Apan ang mga politiko nagtukod og skywalk. Kay wa na may laing kapaingnan nipili silang Lando ug Nitang pagpuyo sa skywalk. Apan ang mga politiko nitukas sa atop sa skywalk aron nga di mahimong kapuy-an ni bisan kinsa.

Dihang naghimo silang Lando ug Nitang og kaugalingong pandong ang mga politiko nisugo sa mga polis ug mga barangay tanod pag-abog nila. Gideklarar ang ilang paghuwam og gamay’ng luna sa skywalk nga wa nila kinahanglana nga mas dakong krimen kay sa paghikaw sa mga politiko sa disenteng pinuy-anan nga maoy tinuod nga gikinahanglan nilang Lando ug Nitang ug ilang kasilinganan.

* * *

Magtiayong Lando ug Nitang nagkinahanglan og tambal sa ilang sakit. Apan wa sila pasudla sa mga ospital sa gobyerno kay niawas nang mga pasyente. Gawas pa, wa silay rekomendasyon gikan sa mga politiko. Nga wa magtagad pakig-ila-ila nila ni pagsusi unsay tinuod nilang mga panginahanglan.

Nagtukod hinuon ang mga politiko og pribadong mga lawak sa mga ospital sa gobyerno. Aron nga makatigom og igong pundo ang mga ospital nga makabarug na sa ilang kaugalingong tiil. Klarong nakalimot nga usa sa nag-unang tahas sa gobyerno mao ang pagpalambo sa kahimsog nilang Lando ug Nitang ug ilang kasilinganan.

* * *

Mga anak nilang Lando ug Nitang nagkinahanglan og edukasyon. Nakasud man tuod sa publikong eskuylahan apan naghuot ang classrooms, nagkuwang ang mga magtutudlo, libro ug lingkoranan. Mabuktot pa sila sa way kinutoban nga mga amotan pagsuhol sa guwardiya, pagtukod og pansayan ug pagbayad sa tubig ug kuryente.

Mga politiko sa pikas nga bahin nigahin og minilyon ka pesos alang sa ilang mga Lakbay Aral. Niinsistir nga mas nagkinahanglan sila og edukasyon kay sa mga anak nilang Lando ug Nitang ug ilang kasilinganan. Bahala na kun mas daghang kuwarta ang nausik sa ilang mga "lakbay" ug nahuman na lang ang daghang termino wa pa gyoy nakuha nga mapuslanong "aral."

* * *

Silang Lando ug Nitang ug ilang kasilinganan nahibawo unsay ilang labing dinalian ug mahinungdanon nga mga panginahanglan. Apan ang ilang tingog wa paminawa sa mga politiko kinsa namugos nga sila ang labing nahibawo unsay labing makaayo alang nilang Lando ug Nitang ug sa ilang kasilinganan.

Mga politikong gihulagway sa ibabaw maoy nagdumili pagtahan sa pork barrel. Naapiki lang sa lapad nga mga protesta maong napugos pagpapas sa PDAF. Apan nagpadayong gamhanang maniobra pagbanhaw ini isip congressional insertions.

Silang Lando ug Nitang ug kasilinganan maoy labing mabulahan kun hingpit nang mapapas ang pork barrel. Mas dakong kahigayonan nga maatiman nang ilang pinuy-anan, kahimsog ug edukasyon nga di na mo-amen sa mga politikong determinadong mamugos sa mga butang nga wa kinahanglana apan makapaburot sa pribado nilang bolsa.

* * *

Email: [email protected].