Pangilad sa mga giingong honorable

Wala mangilad si Senador Jinggoy Estrada sa dihang iyang gipabuto ang bomba atubangan sa iyang mga kaubang Senador nga binayran og tag 50 milyones ka pesos ang 20 ka mga Senador aron mapalagpot si Chief Justice Renato Corona sa iyang katungdanan. Apan sa kanilang tanan, sila si Senador Franklin Drilon, Senate President Juan Ponce Enrile ug Chiz Escudero ang nakadawat og tag usa ka gatos ka milyon ka pesos ( P100M).

Ang kantidad nga gigamit sa pagbayad ngadto sa mga Senador gikuha gikan sa pundo nga gitawag og Development Acceleration Program (DAP). Kining maong pundo wala nato masayri kun wala pa motug-an si Secretary Butch Abad sa Department of Budget and Management mahitungod niini. Si Abad napugos sa pagtug-an niining maong pundo tungod kay wala na siyay kalikayan human        maboking.

Sila si Senador Franklin Drilon nga mao na ang Senate President karon ug Senador Chiz Escudero murag napugos na lamang usab sa pagtug-an sa ilang nadawat nga kantidad tungod kay wala na silay kapaingnan kay apil sa naboking.

Hinuon ilang gipasabot nga gigamit sa ilang mga infrastructure nga proyekto ang ilang nadawat nga dakong kantidad. Ila usab nga gipanghimakak nga bayad kanila ang kantidad tungod sa ilang pagpangusog sa pagpalagpot ni Chief Justice Renato Corona sa katungdanan.

Si Secretary Butch Abad mipasabot nga ang pundo sa Development Acceleration Program pundo nga wala magamit sa gobyerno. Seguro mao kini ang hinungdan kun nganong gigamit na lamang kini sa gobyerno ni Pangulong Noynoy Aquino sa pagpamalit og boto sa mga Senador aron mapalagpot si Corona sa iyang puwesto.

Pastilang paita. Kun kitang mga kabus ang mangayo og pundo, ingnon ta sa gobyerno nga wala, pero kun sila na gani naay daghan nga wala magamit. Dinhi atong makita kun giunsa ta pag ilad sa atong mga giingong Honorable nga mga opisyal.

Ingon gani walay salapi ang gobyerno. Naa man gani diay daghan ug gani wala pa magamit ang uban niini. Unya nganong moingon man silang wala kun mangayo kitang mga kabus para sa mga nag-una natong mga panginahanglan?

Tungod kay daghan na og salapi nga wala magamit ang gobyerno, ila na lamang kining giwaldas. Una, ang Priority Development Assistance Fund nga giabuso pagmaayo sa mga magbabalaud. Ikaduha, ang pundo sa Malampaya nga ila usab nga giwaldas ug karon ang Development Acceleration Fund nga karon lang ta nakahibalo nga anaa diay ning mananapa.

Porbida! Maluoy tawon mong anaa sa gobyerno. Kining maong mga salapi ihatag tawon ni namo kay mas labaw ming nanginahanglan niini. Kun inyo pa ning gihatag namo labing seguro gamay na lang  ming mga pordoy.