Silang Cuenco ug Osmeña

Nagbinungolay hangtod karon silang kanhi kongresista Antonio Cuenco sa habagatang distrito sa Dakbayan sa Sugbo ug kanhi kapitan Jingjing Faelnar sa Barangay Guadalupe. Niaslom ang kasuod nila sa politika tungod sa niulbo nga kontrobersiya sa P15 milyones nga pork barrel ni Cuenco nga gitumong unta pagpamalit og mga lawngon sa kahoy ug langyaw nga mga kanding. Tungod sa wa pa mahuman nga away, di suportahan sa mga Cuenco si Faelnar nga gitakdang modagan pagbalik pagka kapitan sa Guadalupe sa piniliay sa barangay karong Oktubre 28. Mangampanya sila alang sa incumbent nga si Michael Gacasan. Nga mao say gituboy ni kanhi mayor Tomas Osmeña.

* * *

Dihang nahinabi sa Tubag! sa ABS-CBN Cebu, si Cuenco nipasabot sa iyang pagduda nga gibinuangan ang iyang pork barrel ni Faelnar, kinsa maoy nipatuman sa proyekto isip presidente sa Association of Barangay Councils niadtong higayona, maong giimbestigar sila karon sa Visayas Ombudsman:

May nakasulti niya nga overpriced ang seedlings sa fruit trees nga giingon ni Faelnar nga nibalor og P5 milyones (dihang iyang gisusi kasagaran sa seedlings nangamatay ug may seedlings nga niabot sa bukirang mga barangay sa dakbayan nga gawas na sa habagatang distrito); ug

Nahibung sab si Cuenco nganong gipa-encash gyod ni Faelnar ang tseke human nipirma si Faelnar og memorandum of agreement uban sa Department of Agriculture.

* * *

Gibasol sang Cuenco ang iyang kalimtanon (77 anyos na siya) sa nag-usab-usab niyang kasayuran mahitungod sa gigamitan sa P7.6 milyones nga giuli ni Faelnar ngadto sa DA kay wa kapalit sa langyaw nga mga kanding nga maoy gipangayo sa mga mag-uuma:

Unang nahinumdoman ni Cuenco nga Toyota Altis ang gipamalit niyang mga sakyanan alang sa mga barangay kapitan;

Dihang nibalibad ang mga kapitan nga nakadawat sila og Altis, nahinumdoman ni Cuenco nga ang DA nay namalit sa mga sakyanan pinasikad sa panginahanglan sa mga kapitan, maong ang Punta Princesa nahatagan og mini firetruck samtang ang Tisa nakakuha og mini bus; apan

Dayon nakong suwat ini nahinumdoman na sang Cuenco nga ang kuwarta giapud-apod sa mga barangay nga mao nay nagbuot unsang sakyanan ang ilang gikinahanglan.

* * *

Gawas nga managsama ang ilang kandidato pagka kapitan sa Guadalupe, may mga timaan nga di dut sa bukog ang away sa mga Cuenco ug mga Osmeña. May nakahunghong nako nga dihang nag-abot sa Estados Unidos karong bag-o nagsawo og panihapon silang kanhi kongresista Cuenco ug kanhi mayor Osmeña. Si Konsehal James Cuenco niduso og compromise sa South Road Properties tali sa mga konsehal sa Bando Osmena-Pundok Kauswagan ug Team Rama. Gikomedyahan na gani siyang Mayor Mike Rama nga hapit na mobalitok sa BO-PK tungod sa ilang kasuod ni Konsehal Margot Osmeña.

* * *

Email: [email protected]