Daghan ang naguol, nagbagulbol sa Juvenile Law nga naghatag kagawasan sa mga wa pay 18 ang edad nga manubag sa bisan unsang matang sa krimen nga ilang mabuhat. Ang mga polis mipagawas sa ilang kaugtas sa maong balaod nga wa sila’y laing gibasul kundi ang mga magbabalaod nga maoy mipasar niini.
Nagbagulbol ang tanan ilabi na ang mga biktima kay di mapasakaan og kaso ang mga batan-on nga wa pay 18 tungod kay protektado sila sa balaod.
Ang uban nagtuo nga mura lang og gisurambaw sa mga magbabalaod ang katawhan, ang kapolisan ug ang korte.
Tungod kay gipatambok nila ang mga batan-ong kriminal samtang mihugo sa kaugtas ang publiko, polis ug korte.
Ang kasinatian sa kapolisan sa dakbayan mao nga kasagaran sa mga batan-on nga kawatan magdala og birth certificate nga isyu sa NSO aron kun mangawat sila ug hidakpan, way makapanghilabot nga polis kay exempted man sila sa maong sala.
Ihatud sila ngadto sa buhatan sa DSWD, apan tungod kay way mga budget, buhian sa DSWD ug mobalik lang gihapon sa karaang bisyo nga pagpangawat.
Busa sa public hearing sa miaging adlaw, gusto sa publiko, polis ug korte nga ihatag ang maong kagawasan sa tanang matang krimen ngadto sa nag-edad og 13 anyos paubos.