Paita sa kuwarta sa mga magbubuhis nga gipiyal ngadto sa mga magbabalaod nga gigasto sa way kapuslanang mga butang nga di mapuslan sa tanan.
Usa niini mao ang puy-anan sa kanding sa barangay Taptap sa kantidad nga P600 mil nga gitukod taliwa sa kalibonan sa maong barangay.
Way kanding nga gisud niini hinungdan nga puwerting labonga sa mga gunahon ug mga sagbot sa palibot sa maong edipisyo.
Matud pa sa balita nga ang sin kuno nga atop sa maong bay mao kadtong kinanipsan nga bisan huypon lang malumping na.
Wa magamit ang maong bay ug wa kasudli og kanding gumikan sa mga makatarunganong hinungdan, sa laktud gitukod ang maong bay sa kanding nga for your eyes only sa mga magbubuhis kay wa maayo pagka-plano.
Maayo man lang unta kini kun ang atong nasud datu na kaayo nga tungod kay wa nay kalabayan sa mga buhis, hala bisan unsay gustong buhaton sa opisyal nga gipiyalan sa goberno mahimo ra sa kaugalingon niyang pagbuot.
Kana bang mogamit ka sa maong kuwarta nga way sakit kanimo kay di man imoha, busa makatarunganon lang ang katawhan nga mosinggit og tama na , husto na .
Kay ang paggasto sa mga buhis alang sa mga butang nga way kapuslanan ug di magbunga og kaayohan sa mga kabus, maoy usa ka pag-usik-usik niini busa angay kining panubagan sa hingtungdan.