Angayang susihon ang posibling pagpahimulos sa usa ka Non-Government Organization sa koneksiyon sa mga opisyal niini sa dakbayan sa Sugbo.
Kini human nabisto ang pagpangolekta sa Paglaum Basureros 20/20, Inc. og tag P750 isip bayad sa seminar gikan sa mga tag-iya og balay patigayon.
Ang seminar giingon nga usa sa mga requirement aron makakuha og renewal sa ilang business permit ang mga magpapatigayon.
Si Konsehal Nida Cabrera mikwestiyon sa gihimo sa NGO tungod kay wala kini’y pagtugot gikan sa konseho. Nasuta nga dili accredited NGO sa dakbayan sa Sugbo ang Paglaum Basureros aron katugotan nga mohimo og transaksiyon sa ngalan sa dakbayan.
Ang kasayuran nga nahipos ni Cabrera mao nga dunay verbal approval gikan ni Mayor Michael Rama ang gihimo sa NGO. Apan ang problema tungod kay dili si Rama maoy dunay katungod sa paghatag og accreditation kun dili ang konseho.
Ang consultant sa mayor nga si Atty. Jade Ponce miingon nga wala kinahanglana ang accreditation ug pagtugot ni bisan kinsa aron ang usa ka NGO makapasiugda og seminar basta dili lang kini kalapasan sa balaud.
Tinuod, apan ang problema kay ang seminar nga kinahanglang bayran sa mga negosyante gihimo nga requirement sa dakbayan alang sa renewal sa business permit.
Nasuta pa nga ang pangulo sa NGO nga si Francis Paragas sakop diay sa Solid Waste Management Board sa dakbayan sa Sugbo. Wala bay conflict of interest niini?
Kun ang pangulo sa usa ka NGO konektado usab sa dakbayan unya iyang gigamit ang iyang koneksiyon sa dakbayan aron magnegosyo, tingali dunay sayop niini.
Maisip sab ni nga paghatag og pabor sa dakbayan ngadto sa Paglaum Basureros tungod kay dili man lang sila ang bugtong NGO nga dunay katakos nga mohimo og seminar aron pagtuman sa requirement sa renewal sa business permit.
Dili ba nga ubos sa Republic Act 3019 o ang Anti-Graft and Corrupt Practices Act gidid-an man ang gobyerno ug ang mga opisyal niini paghatag og pabor sa usa ka grupo o tawo?
Maayo tingali nga tan-awon sa Ombudsman ang posibling kalapasan nga nahimo sa mga opisyal sa dakbayan niini.
***