Wala nay tsansa sa kalamboan

Subo palandongon kining nahitabo nga laing gubot didto sa Mindanao. Naghatag na usab kini og dakong lama sa sitwasyon sa kahusay ug kalinaw sa maong rehiyon.

Isip taga Mindanao,  subo gayud nga hunahunaon nga mora’g walay katapusan kining problema sa peace and order didto.

Sa probinsiya sa Zamboanga del Sur diin ako natawo ug nagdako, dili na ikatingala ang  mga pagpangatake sa mga rebelde'ng New Peoples Army o mga rebelde'ng Muslim.

Presko pa sa akong panumdoman ang mga engkwentro tali sa mga sundalo ug mga rebelde nga maoy kasagarang moguba sa kalinaw sa maong lalawigan.

Karon, miulbo na usab kining dakong gubot didto sa Zamboanga. Ug nagbandera na usab ang Mindanao sa mga dagkong balita sa tibuok kalibotan.

Kining bag-ong kaguliyang lain na usab nga sagpa sa paningkamot sa  kagamhanan paghakot og dugang mamumuhonan sa nasud. Kinsa pa man ang mobubo og puhonan sa lugar nga puro kaguliyang ang naghari?

Ug usa sa grabe'ng naapektohan niining maong gubot mao ang turismo sa Mindanao. Dugay rang nangyam-id ang mga langyaw'ng turista sa maong rehiyon gumikan sa kanunay nga gubot didto. Dili ikalimod nga daghang mga tourist attractions ang Mindanao.  Puno usab kini sa mga natural resources nga kong maugmad lamang sa kagamhanan maoy makapasulbong sa ekonomiya  sa maong lugar.

Apan ambot kanus-a kaha kini mapahimusli sa mga katawhan didto.  Ug ning padayong gubot sa Mindanao, ang Ginoo na lamang ang mahibalo niining maong mga bahandi.

Daghan ang nag-ingon nga samtang padayon pa ang kaguliyang sa Mindanao, wala g'yud kini tsansa sa tinud-anay'ng kalamboan.

Tinuod gayud kining maong obserbasyon. Pabilin gayud nga walay kausaban ang kahimtang sa katawhan didto kun padayon kining dakong maldisyon.

Kun magkahiusa pa lamang unta ang katawhan sa Mindanao, dili gayud layo ang tumang pag-asenso sa lugar nga giingong yuta sa saad. Dako unta kini og matabang sa nasyonal nga ekonomikanhong kalamboan.

Apan tungod niining mga rebelde'ng Muslim nga nagsandig sa armadong pakigbisog, maayong pagkabusdak sa gihandom nga tumang kalamboan sa katawhan didto.

Wala koy nakitang kaayohan niining mga peace negotiations tali sa kagamhanan sa Pilipinas ug mga rebelde'ng Muslim. Kini tungod lagi sa rason nga wala gayud nagkahiusa ang mga grupo sa mga rebelde, hinungdan nga wala pay konkretong kasabotan nga nakab-ot.

Kining bag-ong gubot didto nagdugang na usab sa dako nang problema  sa kalinaw sa Mindanao.  Ug kun kanus-a kini matapos, ato na lang ihangad ngadto sa kahitas-an.