Sama sa inalisngaw gipakasama sa Biblia ang kinabuhi sa tawo nga sa makadiyot magpadayag ug sa ulahi mahanaw lamang.
Usa na niini ang atong kauban sa trabaho nga si Darrel A. Carumba, kinsa gawas nga magsisibya sa radyo, reporter usab sa Banat News.
Usa siya ka sumbanan nga bisan may apan sa panglawas apan wa kini niya panumbalinga, kun di mipatigbabaw sa iyang pagkatawo ang iyang abilidad sa panuwat sa pamantalaan ug pagsibya sa radyo.
Usa ka maayong tawo, mahigalaon, komedyante, ug sa laktud di mabintahaan sa mga tawong may talento sa kinabuhi.
Sa mga suod kaayo nato nga sama kang Darrel, usahay makaingon kita nga kaanugon, apan kun atong husayon ang tanan managsama ra kita og padulngan.
Sa mingaw ug malinawong lubnganan adto motunhay ang atong hinuwamang lawas kay ang atong kinabuhi moadto man sa naghatag niini nga mao ang Dios.
Sa langit duha ka lugar ang giandam sa Dios, alang sa mga kinabuhi kansang lawas unahon pagbanhaw ug ang mga kinabuhi sa mga lawas sa ulahi nga pagkabanhaw.
Ang unang mabanhaw sa pagbalik ni Kristo mosugat Kaniya aron dad-on sa langit, samtang ang ulahi nga banhawon adto sa imperno, ug kining tanan gitataw sa Biblia.
Tuohan man nato ug di apan mao kini ang kapalaran sa tawo, busa angay nga kauban kita sa unang mabanhaw.