Allowance ug kridibilidad

Dili gyud kalikayan nga motumaw ang pagduda sa kridibilidad sa nahimong hukom ni Regional Trial Court Judge Raphael Yrastorza sa kasong libel batok sa beteranong brodkaster nga si Leo Lastimosa.

Si Yrastorza mipamulta ni Lastimosa og P6,000 ug mimando nga mobayad og P2 milyones isip danyos ngadto ni Garcia. Kini tungod sa lindog ni Lastimosa nga giulohan og “Doling Kawatan”.

Bisan kun moinsister si Yrastorza nga igo lang niyang gibasi sa ebidensiya ang iyang hukom nga nagkonbikto ni Lastimosa sa kasong libel nga gisang-at ni kanhi gobernador ug karon Kongresista Gwen Garcia sa tirsiro distrito sa Sugbo, apan kanunay nga nagpahipi ang mga pagduda.

Ug dili makabasol ang huwis kun dunay mga tawo nga magduda sa kaligdong sa iyang hukom. Kini tungod kay kun wala ko masayop usa siya sa mga huwis sa Regional Trial Court dinhi sa dakbayan nga nagdawat og allowance gikan sa Kapitolyo. 

Labing minus P12,000 ang gidawat nga allowance sa mga huwis sa RTC gikan sa lalawigan ug laing kapin sa P30,000 gikan sa dakbayan sa Sugbo. Sa akong nahinumduman, sila si Judge Mienrado Paredes ug Justice Gabriel Ingles lang ang wala mokobra sa ilang allowance gikan sa Kapitolyo.

Ang ilang gihimo agi ni og protesta kaniadto sa dihang gi-withhold ni Garcia ang allowance ni Judge Bienvinido Saniel niadtong 2008 tungod sa matud pa di paborable nga hukom niini batok sa lalawigan.

Samtang tinuod gitugot sa Local Government Code of 1991 ang paghatag sa mga LGUs og allowance sa mga huwis ug uban pa nga mga opisyal ug kawani sa mga national agencies nga nagbasi sa jurisdiction niini, apan angayan sab nga timbangtimbangon sa mga hingtungdang opisyal kun dili ba sila makasugat og kontrobersiya sa umaabot. Si Justice Inglis kaniadto miingon nga ang iyang gibasihan sa pagdumili pagdawat sa allowance mao ang Sec. 5, canon 1 sa New Code of Conduct of the Philippine Judiciary nga nagkanayon, “judges shall not only be free from inappropriate connection with, and influence by the executive and legislative branches of government and must also appear to be free therefrom to a reasonable observer.” 

Kun nisunod si Judge Yrastorza sa gihimo nilang Paredes ug Ingles kaniadto, iya untang kalikayan ang ingon niini nga sitwasyon sa pagkakaron. Mamahimong limpiyo ang konsensiya ni Judge Yrastorza sa nahimo niyang hukom, apan kapugngan ba niya ang publiko nga magduda nga mamahimong naimpluwensiyahan siya sa kantidad nga iyang gidawat sa Kapitolyo panahon ni Garcia?

Busa aron paglikay sa susama nga kahimtang, maayo tingali nga hunongon na sa mga huwis ang pagdawat og allowance gikan sa mga LGUs nga posibli nga mamahimong kabahin sa kaso sa umaabot.

[email protected].