EDITORYAL - Unsa ang PDAF nga pork ilisan og BEEF?

Wala na ang priority development assistance fund  (PDAF) nga  maoy  ngan  sa giabusohan  nga  pork barrel  sa  mga  magbabalaod.

Maayo  unta  kaayo  ang  PDAF  kay  daghan  kaayong  nagkalainlaing  proyekto  sa  barangay  nga  kagastohan  sa  maong  salapi.

Karong  nasakpan  ang  mga  binuang  sa  minao-mao nga  NGO  nga  maoy  gisudlan  sa  pundo  sa   mga  magbabalaod,  nga  mikabat   sa  P10 bilyones kapin, ilisan  na ang  PDAF og BEEF.

Ang BEEF maoy  acronym  sa Basic Education Enhancement Funds o pundo  nga  alang  sa  mga  panginahanglan  sa edukasyon.

Ilakip  na  niini  ang  mga  edipisyo, mga kahimanan  sa eskuylahan,  laboratory, libro  ug  uban  pa.

Gituohan  nga  mao  na  usab  kini  ang  planohan  sa  mga  magbabalaod  unsaon  pagsikop  sa  kuwarta  niini.

Hinuon  karong  bag-o  pa  ang  hitabo,  usa  pa  ang napriso  nga  mao si Janet Lim  Napoles kinsa maoy  giingong utok  sa  P10 bilyones  nga  pork barrel scam.

Di pa kaayo  isug  ang  mga  kongresista  sa paghimo  og  mga  dautang  laraw  sa  kuwarta  nga  anaa  sa BEEF.

Apan  inigkamingaw  sa  mga  kaso  sa binuang, may  purohan  nga  ipadayon  sa  mga  magbabalaod  ang  susama  sa  ilang  gihimo  sa  PDAF.

Ang   BEEF  maoy  silbing  pork  nga  mao  ang PDAF sa laing ngan.