Ang COA chair

Gi-interview ni Mare Winnie sa iyang tv program adtong Lunes sa gabii si COA Chairman Grace Pulido-Tan ug nakadayeg ko nilang duha.

Way pugong-pugong -- kun no-holds-barred -- ang pinangutan-an ni Mare Winnie: wa sad siya pakyasa ni Ms. Pulido-Tan sa tubag nga iyang gipangita.

* * *

Kalmado ang COA chair sa iyang pagtubag sa mga inisog nga pangutana ni Mare Winnie. Sa pangutana ni Mare Winnie kun wa ba siya mahadlok nga mga gamhanan man ang nalambigit sa kaso nga ilang gi-tackle adtong gabhiuna, si Ms. Pulido-Tan way hiku-hiku nga mitubag “Wala.” Iya ra man kunong gituman ang iyang katungdanan isip COA chief.

Hapit mopakpak si Marie Winnie sa wa pagpasaway sa COA boss.

* * *

Dunay usa ka asawa didto sa China nga grabe ang pagpanimawos niini ngadto sa iyang dagmalan nga bana. Gipatay niya ang mao niyang bana, gitagud-tagud, unya gilat-an ang “karne” sa bana sa pressure cooker.

Leksyon sa mga abusadong bana. Apan di ba sobra ra ning leksyona? Di na man makapahimus ang bana sa leksyon nga iya unta nahikat-onan.

* * *

Didto sa North Korea lain sab ang nanghatag og leksyon. Si Kim Jung-un ang batan-ong lider sa mga Komunistang Koreano.

Suma sa balita, gipa-firing squad ni Kim ang iyang uyab nga si Hyon Song-wol kay nalambigit kini sa pornography isip entertainer.

* * *

TRIVIA. Maayong adlaw diha sa atong mga higala sa Tabunok -- sud ug gawas sa merkado. Hinaut unta nga maayo ang dagan sa atong pagpaninda. Salamat sa inyong suporta sa Banat News.