EDITORYAL - Mga senador milunod sa ilang pork sa NGO

Upat ka senador ang gitataw  sa COA nga milunod sa ilang  mga pork barrel sa walo ka NGO nga kauban ni Janet Napoles.

Gikan sa tuig 2007-2009  mikapin sa P1 bilyon kapin nga  gigasto kuno sa mga proyekto sa panginabuhi sa maong  mga NGO gikan  sa mga  senador.

Tingale nakalimot ang maong mga senador nga anaay daghang ahensya sa goberno nga nagpatuman og proyekto alang sa  panginabuhi.

Maayo sila moimplementar ug maayo mohimo og papeles nga segurado gyud nga  mahiadto  sa mga kabus  ang salapi nga ikatunol kanila sa kagamhanan.

Ugaling lang  kay walay  mahiuli nga  bahin ngadto sa magbabalaod sama sa  senador ug  mga kongresista nga mitunol sa maong  kuwarta ngadto sa maong ahensya.

Hinuon  sa  mga  infrastraktura  may  mga porsento ang  mga  magbabalaod  nga mopatuman  og proyekto pinaagi  sa ilang  pork  barrel.

  Apan  kun  proyekto  sa panginabuhi, basin gamay ra  ang  bahin  sa magbabalaod  sa ilang pork barrel mao tingale hinungdan nga wa sila’y gana  motunol  sa ilang  pork ngadto  sa ahensya  sa goberno.    

Maayo pa papason ang  mga ahensya sa goberno ug NGO na lay padaganon sa kuwarta sa goberno  aron masipong  sa mga  magbabalaod ang dagkong  salapi pagsurambaw aron  moalsa  ang  katawhan batok sa  kagamhanan.