Kampanya paspasi!!!

Tan-awa og nasayup ba ko, wala g’yud. Giingon nako nga human mahanaw dinhi si Chief Superintendent Marcelo Garbo mobalik paghinay-hinay ang operasyon sa mga illegal nga sugal.

Naminaw ko sa report sa akong kauban ug akong nasayran nga pito ka video karera ug Moli-moli machines ang nasakmit sa mga polis nga gipangulohan sa akong higala nga si Chief Inspector Romeo Santander sa Cebu City Intelligence Branch.

Wala ko masayud kun kinsa na ‘sab kaha ang mga operator niining matang sa sugal kay kaniadto nanghunong na man kadtong mga ilado nga operator.

Atong pagakpakan ang mga sakop sa CIB nga gipangulohan sa akong amigo aron dili sila magluya-luya sa paghimo’g kampanya. Unya si Senior Superintendent Noli Romana angay gayud nga dili magluya-luya.

Ayaw kalimot sir nga anaa kanimo karon nagtutok ang mga tawo kay gidungog ka man nga walay gihimo sa kampanya sa illegal nga sugal dihang didto ka pa madistino sa Negros Oriental.

Apan labaw na g’yud nga dili angay’ng magduka-duka mao si Mayor Michael Rama kay siya maoy nagpili ni Kernel Romana nga maoy iyang hepe sa kapolisan dinhi bisan pa og dunay dili maayong report nga iyang nadawat.

* * *

Didto sa Barangay Duljo-Fatima masakmit ang pito ka video karera ug Moli-moli apan dinhi sa ubang dapit sa dakbayan nakadawat pa ko og mga report.

Kadto bitaw nga gireport nako sa Barangay Pasil kaniadto, abtik kaayo nga gipanguha. Sa usa ka dapit sa Barangay Ermita adunay mireport kanako nga naa apan wala pa mohatag og ngalan ang akong informer kang kinsa nga balay ang gibutangan. 

Kadtong dunay report, ipadala kanako sa 09335700853. Unya, maayo kay naundang na diay kadtong tigbakayan diha sa Guadalupe nga akong gihisgutan dinhi, ambot kadtong sa Basak-San Nicolas naundang na ba kaha.

* * *

Unya, kun kampanyahan gani nimo Kernel Romana ang video karera, apila na lang ‘sab ang masyaw kay dili man maayo nga dili kini puohon kay utro pa kini nga binuang – gihimo-himo ra ang numero nga modaug.

Awhagon nako ang CIB nga himoi ninyo og aksyon kining mga imprintahanan nga nangimprinta pagpadayon niining mga masiao tipsheet bisan og ang dakbayan adunay City Ordinance 1616.

Ang maong ordinansa nagdili sa pagpangimprinta, pagbaligya ug paghupot sa mga tipsheets sa masyaw, apan anha ra gud mo sa Sikatuna eskena T. Padilla panahon sa kaadlawon, kakita mo nga walay hunong ang binuang.

Daghan tawon kaayo ang padayong nailad nga makadaug man tuod, kay may padag-on man ‘sab, apan ginagmay ra g’yud tawon.