Ang abuno sa mga magbabalaud

Sa dagkong kontrobersiya nga nalambigit ang Pork Barrel kanunay gayod nga bida ang abuno. Sa panahon ni pangulong Gloria Macapagal Arroyo nabaniog ang Fertilizer Scam diin kapin sa 700 ka milyon ka pesos ang nawagtang sa katawhan tungod sa pagpamalit og abuno sa mga kongresista. Ang sikat nga pangalan sa Fertilizer scam mao si Jokjok Bolante ang Under Secretary kaniadto sa Departamento sa Agrikultura. Ang mga Senador nag-imbestigar sa maong anomaliya.

Karon 10 bilyones ka pesos na usab ang nawagtang sa katawhan gumikan gihapon sa pagpamalit og mga abuno. Apan ning bag-ong anomaliya apil na sa mga Kongresista ang mga Senador. Buot bang ipasabot niini nga nakat-on ang mga Senador gikan sa mga Kongresista unsaon pagkurakot ang pork barrel nila? Buot bang ipasabot niini nga sa ilang pag-imbestigar sa Fertilizer scam, ina kay makat-on ug makasugyot og mga paagi unsaon paglikay sa korapsyon sa pork barrel ang pagpangurakot diay hinuon niini ang ilang nakat-onan?

Pagkaluoy sa abuno. Giabuso ang iyang kagamitan sa mga bag-angang buaya nga nagluko sa mga opisina sa gobyerno. Ang abuno nga gamiton sa pagpatambok sa mga tanom sa mga mag-uuma, gigamit nga pangpatambok sa bulsa sa mga Senador, mga Kongresista nga nalambigit ug mga kakomboya nila.

Ang pork barrel scam usa ka matang sa korapsyon. Sigun sa mga batid ang korapsyon usa ka paggamit ug pag-abuso sa opisina sa gobiyerno para sa kaugalingong interest sa naghupot niini. Duha ka matang ang korapsyon ug kini mao ang institutionalize o grand nga korapsyon ug pity o ginagmay nga korapsyon. Ang pity o ginagmay nga korapsyon mao kini ang atong makita sa kadalanan ug kasagaran sa mga nalambigit niini kadtong mga ubos og ranggong polis ug mga tigpatuman  sa balaud sa trapiko. Samtang ang institutionalize o grand nga korapsyon mao kining pork barrel scam.

Ang institutionalize nga korapsyon dili mahimo kun walay mga kakumboya gumikan kay dinagko kini busa dili lamang ang mga Senador ug mga Kongresista ang mga nalambigit niini. Sama pananglitan sa Departamento sa Agrikultura. Kining nahisgotang departamento mao ang mo-accredit sa mga Non-Governmental Organization (NGO) nga ang tumong mao ang pagtabang sa mga mag-uuma. Kun dili ka accredited sa Departamento sa Agrikultura, dili ka makakuha og pundo sa gobyerno. Busa ang Departamento sa Agrikultura kakonsabo niining bag-ong anomaliya. Hinuon dili na ta matingala kay labing seguro tinudloan ni sila ni Jokjok Bolante.

Ang Securities And Exchange Commission (SEC) wala bay tulubagon kun tinud-on gyod ang imbestigasyon? Kun bogus o piki ang mga NGO's ni Janet Lim Napoles, nganong rehistrado man kini sa SEC? Buot bang ipasabot niini nga irehistro sa gobyerno ang usa ka piki nga organisasyon? Kun maohon dili na diay kita makaseguro sa mga organisasyon bisan pa kini rehistrado? Ambot lang.